Şirkətlər iş imkanı təklif etdi, tələbə və məzunlar isə... - REPORTAJ

Şirkətlər iş imkanı təklif etdi, tələbə və məzunlar isə... - REPORTAJ

Fərqanə Rəsulova Bakı Dövlət Universitetinin tələbəsidir. Məzun olanda təcrübəli kadrlara uduzmasın deyə gələcək karyerasını indidən düşünmək məcburiyyətindədir. Ona görə də hələ “Biotexnologiya” ixtisası üzrə II kursda təhsil almağına baxmayaraq, iş və təcrübə imkanları axtarışındadır. Bakı Dövlət Universitetində təşkil edilən Karyera Festivalına məhz bu məqsədlə gəlib: “Xaricə getmək imkanı verən təkliflərlə maraqlandım. Könüllü proqramlar da bu imkanı yaradır, odur ki, həmin proqramlarla da maraqlandım. Məlumat verdilər ki, ingilis dilində bilik səviyyəmdən asılı olaraq, müxtəlif ölkələrdə fəaliyyət imkanım var”.

Aprel ayından başlayaraq, universitetlər karyera sərgiləri təşkil edir. Onlar bu yolla işəgötürənlərlə əməkdaşlıq çərçivəsində tələbə və məzunların qarşısına bir sıra imkanlar çıxarır, tələbələrinin təhsilini yetişmiş kadr kimi bitirməsinə, məzunların qısa müddətdə işlə təmin olunmalarına  çalışır. Növbəti belə karyera imkanı Bakı Dövlət Universitetində təşkil edilən karyera festivalında təqdim edilib. 100-dən çox şirkət universitetin həyətində stend açıb, təkliflərini sıralayıb. Bakı Dövlət Universiteti (BDU), Dövlət Məşğulluq Agentliyi və BDU-nun Tələbə Həmkarlar İttifaqı Komitəsinin (THİK) birgə təşkilatçılığı ilə keçirilən Karyera Festivalında ölkəmizin 100-dən çox nüfuzlu işəgötürəni BDU-nun tələbə və məzunlarına 1200-dən artıq vakansiya, 500-dək təqaüd proqramı təqdim edib.

Şirkətlər təklif etdilər

Stend quran şirkətlərdən biri - Aqrar Sığorta Fondunun əməkdaşı Fatma Hüseynova “Azərbaycan müəllimi”nə bildirib ki, məzunları əmək fəaliyyətinə aqrar sığorta eksperti kimi cəlb etməyə çalışırlar: “Aqrar sığorta eksperti bizim üçün əsas kadr sayılır, çünki ödənişləri onların rəyləri əsasında veririk. Hazırda sahə yeni olduğu üçün kadr ehtiyacı böyükdür. Bu ehtiyacı, əsasən, Türkiyədən dəvət edilən ekspertlərlə ödəməyə çalışırıq. Ancaq bir yandan da öz ekspertlərimizi yetişdirmək üçün il ərzində bir neçə dəfə təlimlər, Dövlət İmtahan Mərkəzi ilə birlikdə müstəqil ekspert fəaliyyəti üzrə imtahan təşkil edilir və uğurla keçənlər sertifikat alaraq müqavilə əsasında fəaliyyətə başlayırlar. Ötən il ərzində 200-dən artıq şəxs ekspert kimi təlimlərə qatılıb və uğur qazananlar işə götürülüblər”.

Həmi vakansiyalara əsasən ADAU, LDU tələbələrinin müraciət etdiyini bildirən F.Hüseynova BDU-nun Ekologiya və torpaqşünaslıq fakültəsinin məzunlarının da onlarla işləyə bildiyini deyir: “Növbəti ildən BDU-da magistratura səviyyəsində “Aqrar sığorta” ayrıca fənn kimi tədris ediləcək. Artıq BDU ilə bu barədə razılıq əldə edilib. Ümumiyyətlə, çalışırıq ki, universitetlərdə aqrar sığorta ayrıca fənn kimi tədris olunsun”.

F.Hüseynovanın sözlərinə görə, bu ehtiyacı ödəmək üçün nəinki universitetlər, həm də orta ixtisas təhsili müəssisələri ilə əməkdaşlıq edirlər: “Kolleclərdə də bizə uyğun ixtisaslar var və onları da təlimlərə və təcrübəyə cəlb etməyə çalışırıq”.

 “Paşabank”ın işə qəbul komandasının əməkdaşı Nisə Tağızadə “Azərbaycan müəllimi”nə açıqlamasında deyib ki, tələbələr Karyera Festivalında daha çox təcrübə proqramları ilə maraqlanıblar: “Ancaq bir problem var ki, artıq təcrübə proqramları başlayıb. Ona görə də bu cür karyera sərgilərinin aprel ayında keçirilməsi daha məqsədəuyğun olar”.

“Paşabank” festivalda vakansiya da çıxarıb: “Müəyyən strukturlarda vakansiyalar təklif edirik, kriteriyalarımıza uyğun olanları dəyərləndirməyi düşünürük”.

Sosial Xidmət Agentliyinin nümayəndələri məlumat veriblər ki, psixoloq, sosial işçi, loqoped, aktiv terapevt və həkim ixtisasları üzrə vakansiyalar təklif edirlər. Regionlar üzrə də vakansiyaların siyahısı stendə yaxınlaşan hər kəsə təqdim edilir: “Regionlarda həkim-pediatr, sosial işçi, pedaqoq, baş mühasib, psixoloqlara ciddi ehtiyac var. Həmin ixtisaslar üzrə təcrübə proqramları və vakansiyalar çoxdur. İxtisası uyğun gələn hər kəs müraciət edə bilər. Festivalda iştirak edənlərə də bildiririk ki, sadəcə, özləri üçün maraqlanmasınlar, tanıdıqları arasında bu ixtisas üzrə mütəxəssislər varsa, ehtiyac barədə onlara da məlumat versinlər”.

DOST Agentliyinin İnsan resursları və işə qəbul şöbəsinin böyük mütəxəssisi Ərşad Hacıbəylinin sözlərinə görə, festivalda onlara müraciət həddindən çox olub: “Biz iki nəfərik. Bəzən stendimizə o qədər çox gənc yaxınlaşır ki, fiziki cəhətdən onların suallarını cavablandırmağımız mümkün olmurdu. Əsasən “Könüllü dost” proqramı ilə maraqlananlar çox oldu. Proqram gün ərzində 3 növbəli təşkil olunduğu üçün tələbələr rahat iştirak edir, onun asanlıqla öz vaxtları ilə uyğunlaşdırırlar. Bu onların dərslərinə mane olmur. Aktiv vakansiyalarımız üçün də müraciətlər oldu, CV-lər götürmüşük”. 

Karyera Festivalı həm könüllü, həm təcrübə, həm də vakansiyalarla tanışlıq imkanı yaradır. Vakansiyalarda təcrübəçi kimi başlayanların işçi olmaq şansı var və tələbələr arasında bu imkandan məharətlə istifadə edənlər çox olur. 

Tələbələr təklifləri dəyərləndirdilər

Təkliflərlə maraqlananlardan biri də universitetin “Kimya” ixtisası üzrə III kurs tələbəsi Aytac Rəsulovadır. Dediyinə görə, Karyera Festivalında təcrübə proqramları ilə maraqlanıb: “Festival barədə universitetin “Whatshapp” qrupundan məlumat aldım. Yaxşı ki gəldim, burada o qədər çox şirkət var, adam hansı müəssisə ilə maraqlanacağını unudur. “SOCAR”, “Metak” şirkətlərinin stendlərinə yaxınlaşdım. Hədəflərimdən biri “SOCAR”da çalışmaqdır”.

Taleh Gülalıyev “Kimya” ixtisası üzrə IV kurs tələbəsidir. Ona görə laboratoriyası olan müəssisələrlə maraqlanıb: “Bundan başqa, proqramlaşdırma bacarığım da var və bu sahəyə çox həvəsliyəm. Bu bacarığıma uyğun işlərlə də maraqlandım. Əksəriyyəti elektron ünvanına CV göndərməyimi istədi, bəziləri motivasiya məktubu tələb etdilər”. 

Ramazan Siracoğlu Beynəlxalq münasibətlər və iqtisadiyyat fakültəsində “Beynəlxalq ticarət və logistika” ixtisası üzrə IV kurs tələbəsidir: “Daha çox Abşeron Logistika Mərkəzi ilə maraqlandım. Ancaq hazırda hərbi xidmətə hazırlaşıram. Ümid edirəm ki, qayıdandan sonra qarşıma daha yaxşı şanslar çıxacaq”.

R.Siracoğlu hesab edir ki, bu cür tədbirlər tələbə və məzunlar üçün çox faydalıdır.

Əhəd Qocazadə də “Beynəlxalq ticarət və logistika” ixtisası üzrə IV kursda oxuyur: “Hesab edirəm ki, universitetimiz belə sərfilərlə çalışır ki, tələbələrinə karyera istiqamətində bir yol göstərsin. Bu səyləri yüksək dəyərləndirirəm və əminəm ki, universitetimizin tələbəyönümlü cəhdləri sayəsində həm böyük təcrübə imkanı yaranacaq, həm də məzunlarının daha yaxşı iş tapmaq şansı artacaq. Bu baxımdan karyera sərgilərinin keçirilməsini əhəmiyyətli hesab edirəm”.

Əhəd də logistika istiqamətində mövcud vakansiyalarla maraqlanıb: “Vakansiyalarla maraqlandım. Şirkətlərin vakansiyalarının əlçatan olduğunu öyrəndim. Xüsusən də logistika üzrə vakansiyalar çoxdur. Qarabağda işğaldan azad olunan ərazilərdə logistikaya çox böyük ehtiyac var. Hazırda yenidənqurma və bərpa işləri gedən regionda, xüsusən Zəngəzur dəhlizi açılandan sonra logistikanın rolu əhəmiyyətli dərəcədə artacaq. Ona görə də bu istiqamətdə ölkəmizdə kadr hazırlığına ciddi əhəmiyyət verilir, tələbələri düzgün yönləndirir, onların iş və ya təcrübə qazanmasında əhəmiyyətli rol oynayırlar”.

Tərəfdaşlar festivalla bağlı nə düşünür?

BDU-nun rektoru Elçin Babayev “Azərbaycan müəllimi”nə deyib ki, universitetdə bir neçə ildir keçirilən Karyera Festivalı ilk növbədə tələbə və məzunları ölkənin aparıcı təşkilat və şirkətləri ilə bir araya gətirmək, onların əmək bazarına uğurlu inteqrasiyasını təmin etmək, savadlı, bacarıqlı və təcrübəli gənclərin ixtisasyönümlü karyera perspektivlərini dəstəkləyir: ““Açıq qapı” formatında təşkil edilən festivalda digər universitetlərin tələbə və məzunları, həmçinin işsiz və işaxtaran vətəndaşlar da iştirak ediblər. Festivalda iştirak edən 100-dən çox aparıcı dövlət qurumu, özəl şirkət və müəssisə öz fəaliyyət istiqamətləri, mövcud vakansiyaları, təqaüd və  təcrübə proqramları haqqında ətraflı məlumat təqdim ediblər. Festival çərçivəsində iştirakçılar işəgötürənlərlə tanış olmaq, vakansiyalara müraciət etmək, CV təqdim etmək və müsahibə simulyasiyalarında iştirak etmək imkanına sahib olurlar. Festivalda tələbə və məzunların bilik və bacarıqlarının inkişaf etdirilməsi istiqamətində “workshop”, təlim və seminarlar keçirilir, simulyasiya və startap guşələri təşkil edilir. Əminik ki, festival əmək bazarında yeni əməkdaşlıq körpüləri yaradacaq və gənclərin iş həyatı üçün uğurlu bir başlanğıc olacaq”.

Dövlət Məşğulluq Agentliyinin sədr müavini Ülvi Abbasquliyevin fikrincə, Karyera Festivalı məzunların məşğulluğu, işlə təmin olunması baxımından ən önəmli alətlərdən biridir. Bu zaman işaxtaranlarla işəgötürənlər canlı ünsiyyət qururlar. Tələbələr və universitetlərlə olan işbirliyi güclənir, işəgötürənlər yeni kadr potensialı əldə edir: “Son illərdə əmək bazarında bir sıra peşə və ixtisaslar öz əhəmiyyətini itirib, əvəzində müasir çağırışlara cavab verən yeni ixtisaslar yaranıb. Bu baxımdan universitet və tələbələr müasir çağırışlara hazır olmalı, texnologiyanın inkişafını nəzərə almalıdırlar”.