AzMİU-da COP29 ilə bağlı konfrans keçirilib

AzMİU-da COP29 ilə bağlı konfrans keçirilib

Azərbaycan Memarlıq və İnşaat Universitetinin (AzMİU) 50 illik yubileyinə həsr olunmuş “COP29 və yaşıl enerjinin Azərbaycan Respublikasının inkişafına töhfəsi” mövzusunda elmi konfrans keçirilib. 

Universitetdən “Azərbaycan müəllimi”nə bildirilib ki, Beynəlxalq Ekoenergetika Akademiyası ilə birgə təşkil olunan konfrans ətraf mühitin qorunması və alternativ enerji texnologiyalarının tətbiqi sahəsində aktual məsələlərin müzakirəsinə həsr olunub.

Konfransın keçirilməsində əsas məqsəd COP29-un ölkəmiz üçün əhəmiyyəti, yaşıl enerji sahəsində mövcud çağırışlar və bu texnologiyaların Azərbaycan Respublikasının sosial-iqtisadi və ekoloji inkişafına mümkün təsirlərinin araşdırılması olub. Konfrans çərçivəsində ekoloji dayanıqlılıq, süni intellektin tətbiqi və müasir texnoloji yanaşmaların ətraf mühitin mühafizəsində rolu geniş şəkildə işıqlandırılıb.

Konfransın açılışında çıxış edən universitetin Ekologiya kafedrasının müdiri, Beynəlxalq Ekoenergetika Akademiyasının prezidenti professor Fəqan Əliyev iştirakçıları salamlayaraq AzMİU-nun bu istiqamətdə həyata keçirdiyi elmi tədqiqatlardan, maarifləndirici təşəbbüslərdən bəhs edib. O, universitetin dayanıqlı gələcək üçün hazırladığı strategiyaların ölkənin ümumi ekoloji siyasətinə uyğun inkişaf etdiyini vurğulayıb.

Konfrans çərçivəsində təqdim olunan məruzələr sırasında aşağıdakı mövzular xüsusilə maraq doğurub:

– “Heydər Əliyev irsinin Azərbaycan memarlığına verdiyi töhfələr”

– “Abşeron yarımadasında göl sularının təmizlənməsi: günəş texnologiyası və səmərəliliyinin qiymətləndirilməsi”

– “Tullantı və onların idarə olunması”

– “Süni intellekt və proqramların iqlim dəyişikliyi baza məlumatları yığmasında və elmi-tədqiqatların aparılmasında rolu”

– “Qarabağ və Şərqi Zəngəzur çaylarının ekoloji vəziyyətinin tədqiqi”

– “Nanomaterialların inşaat sənayesində tətbiqləri”

– “Cəbrayıl, Qubadlı və Zəngilan rayonlarının məsafədən zondlama materiallari əsasinda torpaq səthinin temperaturu analizi”

– “Dekarbonizasiya, iqlim dəyişmələri və davamlı inkişaf”

– “Yaşıl hidrogen enerjisinin alınma üsullarının müqayisəli təhlili”

Konfransda universitetin professor-müəllim heyəti ilə yanaşı, doktorantlar və tələbələr də fəal iştirak ediblər. Təqdim edilən elmi çıxışlarda multidisiplinar yanaşmaların və müasir texnologiyaların ətraf mühitin mühafizəsi və iqlim dəyişikliklərinə qarşı mübarizədə əhəmiyyəti xüsusi vurğulanıb.