- 231
- 16 Noyabr 2024 16:59

MEK-də AMEA-nın 80 illiyinə həsr olunmuş “Qalib Azərbaycan” mövzusunda rəsm sərgisi keçirilib
- 26 İyun 2025 11:21 |
- Kateqoriya : AMEA |
- 5
MEK-də AMEA-nın 80 illiyinə həsr olunmuş “Qalib Azərbaycan” mövzusunda rəsm sərgisi keçirilib
Azərbaycan Milli Elmlər Akademiyasının (AMEA) 80 illik yubileyi münasibətilə AMEA-nın Mərkəzi Elmi Kitabxanasında (MEK) “Zirvə” Ziyalılar Təşkilatının təşəbbüsü və təşkilatçılığı ilə “Qalib Azərbaycan” mövzusunda rəsm sərgisi keçirilib.
Sərginin məqsədi müstəqil Azərbaycanın inkişaf yolunu, xalqımızın mədəni-mənəvi irsini və qələbə ruhunu incəsənətin dili ilə əks etdirmək, eyni zamanda elmi ictimaiyyətin mədəni yaradıcılıq potensialını üzə çıxarmaq olub.
Tədbirdə AMEA-nın müxtəlif institut və təşkilatlarının əməkdaşları, incəsənət və elm xadimləri, ziyalılar, gənc rəssamlar, media nümayəndələri iştirak ediblər.
Sərgidə AMEA əməkdaşlarının və onların övladlarının əl işlərindən ibarət 60-dan çox rəsm əsəri nümayiş olunub. Əsərlər arasında portretlər, mənzərələr, milli motivli rəsmlər, müasir üslubda işlənmiş kompozisiyalar və dekorativ tətbiqi sənət nümunələri yer alıb. Tablolarda xalqımızın zəfər dolu tarixi, Qarabağ həqiqətləri, milli qürur və vətən sevgisi xüsusi bədii dildə ifadə olunub.
Sərginin açılış mərasimində çıxış edən AMEA Memarlıq və İncəsənət İnstitutunun direktoru, AMEA-nın müxbir üzvü Ərtegin Salamzadə çıxış edərək sərginin əhəmiyyətindən bəhs edib, bu kimi tədbirlərin elmi və mədəni həyatın inteqrasiyası baxımından mühüm rol oynadığını bildirib. O, qeyd edib ki, sayca 25-ci olan sərgi artıq 11 ildir ki, Akademiya daxilində təşkil olunur. Alim bildirib ki, müxtəlif yaş kateqoriyasından olan iştirakçıların qatıldığı Qalib Azərbaycan” sərgisi həm elmi-mədəni əməkdaşlığın, həm də yaradıcılığın vətənpərvərlik ruhunda birləşməsinin gözəl nümunəsidir.
Tədbirdə, həmçinin İnstitutun direktor müavini, sənətşünaslıq üzrə fəlsəfə doktoru, dosent Xəzər Zeynalov, Mədəniyyət Nazirliyinin məsul əməkdaşı Sənan Talıbov və Uluslararası Aktivist Sənətçilər Birliyinin Azərbaycan təmsilçisi Nəvai Metin çıxış ediblər. Onlar bu sərginin keçirilməsinin xüsusi əhəmiyyət daşıdığını vurğulayaraq, bütün iştirakçılara yaradıcılıq uğurları arzulayıblar. “Zirvə” Ziyalılar Təşkilatının prezidenti, AMEA-nın baş rəssam konstruktor-dizayneri, ictimai və incəsənət xadimi Minayə Dəyanət Feyzullayeva isə çıxışında sərginin təşkilinə dəstək verən hər kəsə təşəkkürünü bildirib və bu layihənin davamlı olacağını vurğulayıb.
MEK-in direktoru, texnika elmləri doktoru Hüseyn Hüseynov öz növbəsində sərgini, həm də AMEA-nın 80 illik şərəfli tarixini qeyd etmək, alimlərin və onların ailə üzvlərinin yaradıcılığını təşviq etmək baxımından yadda qalan tədbirlərdən biri kimi dəyərləndirib. O, kitabxana olaraq bu cür tədbirlərin keçirilməsinə daim dəstək göstərdiklərini də diqqətə çatdırıb.
Sərgidə iştirak edən tanınmış rəssam Hüseyn Hacıyev “Kitabi-Dədə Qorqud -1300” adlı əsərini MEK-ə hədiyyə edib.
Sərgidə iştirak edənlərə xüsusi sertifikatlar və hədiyyələr təqdim olunub.