Mərkəzi Elmi Kitabxana 2025-ci ilin ilk yarımillik fəaliyyəti üzrə Rəyasət Heyəti qarşısında hesabat verib

Mərkəzi Elmi Kitabxana 2025-ci ilin ilk yarımillik fəaliyyəti üzrə Rəyasət Heyəti qarşısında hesabat verib

Azərbaycan Milli Elmlər Akademiyasının (AMEA) Mərkəzi Elmi Kitabxanasının Rəyasət Heyəti qarşısında (MEK) 2025-ci ilin birinci yarımilliyi üzrə elmi və təşkilati fəaliyyətin yekunlarına həsr olunan hesabatı dinlənilib.

Hesabatı təqdim edən MEK-in direktoru texnika elmləri doktoru Hüseyn Hüseynov bildirib ki, cari ilin birinci yarısında kitabxana ölkənin elmi-informasiya məkanında mühüm nəticələr əldə edib. Direktor, fəaliyyətin əsas istiqamətləri kimi fondların zənginləşdirildiyini və rəqəmsallaşdırıldığını, oxuculara informasiya xidmətinin göstərildiyini, kitabxana-informasiya texnologiyalarının tətbiqini və beynəlxalq əməkdaşlığın genişləndirildiyini qeyd edib.

MEK rəhbəri 2025-ci ilin ölkədə “Konstitusiya və Suverenlik İli” elan olunması ilə əlaqədar kitabxana tərəfindən biblioqrafik göstəricinin hazırlandığını, ənənəvi və virtual kitab sərgilərinin təşkil olunduğunu, müxtəlif tədbirlərdə fəal iştirak etdiyini diqqətə çatdırıb. Eyni zamanda, Azərbaycan Milli Elmlər Akademiyasının 80 illik yubileyi münasibətilə “AMEA – 80” adlı virtual sərgi hazırlanıb, “Azərbaycan Milli Elmlər Akademiyası” adlı ensiklopedik məqalə redaktə olunaraq oxuculara təqdim edilib.

Direktor kitabxananın 100 illiyi çərçivəsində “Mərkəzi Elmi Kitabxananın inciləri” və “Mərkəzi Elmi Kitabxananın nəşrləri” adlı biblioqrafik göstəricilərin işıq üzü gördüyünü, digər nəşrlərin isə çapa hazırlandığını vurğulayıb.

2025-ci ilin birinci yarısında MEK-in yenilikləri və islahatlarından danışan H.Hüseynov inklüziv kitabxana mühitinin formalaşdırılması istiqamətində də mühüm təşəbbüslərin irəli sürüldüyünü, “MEK könüllüləri” və “Açıq qapı”nın uğurlu layihələr sırasında yer aldığını bildirib.

Natiq onu da qeyd edib ki, təhsil və metodiki əməkdaşlıq sahəsində də vacib tədbirlər görülüb. Belə ki, elmi müəssisələrdə çalışan kitabxanaçılar üçün metodiki təlimlər, müxtəlif ali məktəblərin tələbələri üçün istehsalat təcrübələri, həmçinin Vikipediya və rəqəmsal informasiya resursları üzrə praktiki məşğələlər keçirilib.

Direktor onu da diqqətə çatdırıb ki, hesabat dövründə Sərgi salonunda 40-a yaxın tematik sərgi təşkil olunub, görkəmli şəxsiyyətlərin yubileyləri və əlamətdar günlər qeyd edilib və kitabxananın fondundan çoxsaylı sənəd oxucuların istifadəsinə verilib. Həmçinin Kitabxanalararası Abunə xidməti vasitəsilə AMEA-nın müxtəlif institutlarının kitabxanalarından 50-dən artıq sənəd istifadəçilərə çatdırılıb.

Sonda Hüseyn Hüseynov bildirib ki, elektron kitabxananın formalaşdırılması istiqamətində də mühüm addımlar atılıb – bu dövrdə 50.000 PDF sənəd toplanıb.

Hesabatı dinləmək üçün AMEA prezidentinin sərəncamına əsasən tədbirdə iştirak edən Rəyasət Heyəti Aparatının Elm və Təhsil şöbəsinin müdiri, filologiya elmləri doktoru Sərxan Xavəri təqdimatı uğurlu adlandırıb və yeniləşən Akademiyanın tələblərinə uyğun olaraq hesabat dövründə Mərkəzi Elmi Kitabxananın fəaliyyətini təqdirəlayiq hesab edib. Oxucuların elmi informasiya ilə təmin olunmasındakı əhəmiyyətli rolunu nəzərə çatdırıb.