Mingəçevir Dövlət Universiteti və Azərbaycan-Türkiyə İş Adamları Birliyi arasında əməkdaşlığa dair Memorandum imzalanıb

Mingəçevir Dövlət Universiteti və Azərbaycan-Türkiyə İş Adamları Birliyi arasında əməkdaşlığa dair Memorandum imzalanıb

2025-ci il iyulun 24-də Mingəçevir Dövlət Universiteti (MDU) ilə Azərbaycan-Türkiyə İş Adamları Birliyi (ATİB) arasında birgə əməkdaşlığa dair Memorandum imzalanıb. Sənədi MDU-nun rektoru Anar Eminov və ATİB-in İdarə Heyətinin sədri Mürsəl Rüstəmov imzalayıblar.

Memorandumun imzalanması münasibətilə universitetin rektoru A.Eminovun rəhbərlik etdiyi nümayəndə heyəti ATİB-in ofisini ziyarət edib. Görüş zamanı tərəflər arasında qarşılıqlı əməkdaşlıqla bağlı fikir mübadiləsi aparılıb, universitet–sənaye əməkdaşlığının yeni mərhələyə keçidi üçün imkanlar müzakirə olunub.

Rektor Anar Eminov universitetin strateji hədəflərindən biri kimi tələbələrin praktiki bacarıqlarının artırılması və əmək bazarına daha hazırlıqlı şəkildə daxil olmalarının dəstəklənməsini vurğulayıb. O, bu məqsədlə sənaye nümayəndələri ilə birbaşa əməkdaşlığın əhəmiyyətini qeyd edərək, ATİB-lə imzalanan memorandumu bu istiqamətdə atılmış əhəmiyyətli addım kimi dəyərləndirib. Rektor birliyin təqdim etdiyi imkanlara görə təşəkkürünü ifadə edib və bu əməkdaşlığın regionun iqtisadi və sosial inkişafına da töhfə verəcəyinə əminliyini bildirib.

ATİB-in İdarə Heyətinin sədri M.Rüstəmov isə ali təhsil müəssisələri ilə əməkdaşlığın Birliyin fəaliyyətində mühüm yer tutduğunu bildirərək öz fəaliyyətləri barədə məlumat verib. O, MDU-nun inkişaf meyillərini və əmək bazarının çağırışlarına cavab verən yanaşmalarını təqdirəlayiq hesab etdiyini qeyd edərək, bu əməkdaşlığın həm təhsil alan gənclərə, həm də iş dünyasına fayda gətirəcəyinə inandığını vurğulayıb.

İmzalanan memorandum çərçivəsində tərəflər bir sıra istiqamətlər üzrə əməkdaşlıq etməyi razılaşdırıblar. Bunlara tələbələrin ATİB-ə üzv şirkətlərdə istehsalat təcrübəsinə cəlb olunması, karyera və iş yarmarkalarının təşkili, biznes mütəxəssislərinin universitetdə dərslərə cəlb olunması, innovasiya və startap təşəbbüslərinin dəstəklənməsi, üçtərəfli (Türkiyə tərəfdaşları ilə) layihələrin hazırlanması, təqaüd proqramlarının təşkili və birgə elmi-praktiki tədbirlərin həyata keçirilməsi daxildir. Memorandum, eyni zamanda, ATİB-in üzv şirkətləri ilə MDU arasında daha sıx əlaqələrin qurulmasına, universitet əməkdaşlarının və tələbələrinin peşəkar inkişafına yönəlmiş ixtisasartırma proqramlarının təşkilinə imkan yaradacaq.

Bununla yanaşı, görüş zamanı birliyin üzvü olan iş adamlarının 2025-ci ilin sentyabr-oktyabr aylarında Mingəçevir Dövlət Universitetinin əməkdaş və tələbələri ilə görüşlərinin təşkili, universitet məzunlarının işlə təmin olunması məsələləri üzrə müzakirələrin davamının Mingəçevir şəhərində keçirilməsi ilə bağlı razılıq əldə olunub.

Qeyd edək ki, bu memorandum tərəflər arasında səmərəli, davamlı və qarşılıqlı faydalı əməkdaşlığın qurulmasına zəmin yaratmaqla yanaşı, ölkədə universitet-sənaye inteqrasiyasının inkişafına da önəmli töhfə verməyi hədəfləyir.

✅ Mingəçevir Dövlət Universiteti və Azərbaycan-Türkiyə İş Adamları Birliyi arasında strateji əməkdaşlıq qurulur!

📍 MDU və ATİB arasında əməkdaşlığa dair Memorandum imzalanıb!

🎯 Əsas məqsəd – tələbələrin praktiki bacarıqlarının artırılması, universitet-sənaye əməkdaşlığının gücləndirilməsi və gənclərin iş dünyasına inteqrasiyasının dəstəklənməsidir.

🔴 Əməkdaşlıq çərçivəsində razılaşdırılan əsas istiqamətlər:

➡️ Tələbələrin ATİB üzvü olan şirkətlərdə istehsalat təcrübəsinə cəlb olunması;

➡️ Karyera günləri və iş yarmarkalarının təşkili;

➡️ Biznes nümayəndələrinin universitetdə tədris prosesinə qoşulması;

➡️ Startap təşəbbüslərinə dəstək və innovativ layihələrin birgə icrası;

➡️ Məzunların birliyin üzvü şirkətlərdə işlə təmin olunması

➡️ Türkiyə tərəfdaşlı üçtərəfli layihələrin hazırlanması;

➡️ Təqaüd proqramları və ixtisasartırma imkanlarının yaradılması.

👏 Bu memorandum MDU-nun tətbiqyönümlü təhsil modelini daha da gücləndirəcək və regionun iqtisadi inkişafına töhfə verəcək. Əməkdaşlığın qurulması və Memorandumun imzalanmasında göstərilən dəstəyə görə M.Rüstəmov başda olmaqla ATİB-in rəhbərliyinə təşəkkür edirik

✅ Universitetimiz Sizinlə böyüyəcək, Sizinlə yüksələcək!

#MDU #MingəçevirDövlətUniversiteti

#ATİB #AzərbaycanTürkiyəİşAdamlarıBirliyi

#UniversitetSənayeƏməkdaşlığı

#Təcrübəİmkanları #StartapDəstəyi #TətbiqyönümlüTəhsil