“Harvard, Stanford, Oksford...” – Nüfuzlu universitetlərdə təhsil alacaq gənclərlə görüş

“Harvard, Stanford, Oksford...” – Nüfuzlu universitetlərdə təhsil alacaq gənclərlə görüş 

Avqustun 13-də Azərbaycan Dövlət Neft və Sənaye Universitetində “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”nın təqaüdçüsü adını qazanmış gənclərlə orientasiya görüşü keçirilib. 

Tədbirdə Dövlət Proqramı qalibləri, proqramın icraçı heyəti və digər rəsmi qonaqlar, valideynlər, KİV nümayəndələri iştirak ediblər.  

Dövlət Proqramı İdarəetmə Qrupunun proqram iştirakçıları ilə iş üzrə mütəxəssisi Nərmin Bünyatova görüşün mövzusu barədə məlumat verib. O, DP İdarəetmə qrupunun fəaliyəti, proqrama qəbulun nəticələri barədə danışaraq xaricdə təhsil alacaq tələbələrin təhsili, tədris prosesinin təşkili, koordinasiyası, maliyyələşdirilməsi ilə bağlı çoxsaylı məqamlara aydınlıq gətirib.  

Bildirilib ki, artıq 2025/2026-cı tədris ili üçün Dövlət Proqramı çərçivəsində dünyanın 14 ölkəsinə aid 64 nüfuzlu ali təhsil müəssisəsində 125 bakalavriat, 356 magistratura və 19 doktorantura səviyyəsində olmaqla, ümumilikdə 500 nəfər təhsil almaq hüququ qazanıb. Proqram iştirakçısı seçilən 500 nəfərin 160-ı dünya universitetlərinin qlobal reytinq sıralamasında Top-10-luqda yer alan ali məktəblərdə təhsil alacaq. Onlardan Stanford Universiteti, Massaçusets Texnologiya İnstitutu, Sinqapur Milli Universiteti, Oksford Universiteti, Berkli Kaliforniya Universiteti, ETH Sürix, Harvard Universiteti, Yel Universiteti kimi nüfuzlu ali təhsil müəssisələrini qeyd etmək olar.  

Görüş çərçivəsində tələbələri maraqlandıran sualların cavablandırılması üçün sual-cavab sessiyası təşkil olunub. Sessiyada xaricdə təhsil almaq hüququ qazanan gəncləri təhsil dövründə qarşılaşa biləcəkləri çətinliklərin aradan qaldırılması, proqram iştirakçıları ilə qurumlar arasında əlaqələrin yaradılmasından bəhs olunub, xaricdə təhsilin bütün aspektləri üzrə gəncləri maraqlandıran suallara cavablar verilib. 

Əlavə edək ki, Azərbaycan Respublikasının Prezidenti İlham Əliyevin Sərəncamı ilə təsdiq olunmuş "Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”nın hədəfi gənclərə xarici ölkələrin nüfuzlu ali təhsil müəssisələrində təhsil almaq imkanı yaratmaqla ölkəmizin dayanıqlı inkişafını təmin edəcək və qlobal çağırışlara cavab verəcək yeni texnologiyaları çevik mənimsəyən, praktiki bilik və bacarıqlara yiyələnən, müasir və gələcək əmək bazarının tələblərinə cavab verən rəqabətqabiliyyətli və yüksəkixtisaslı peşəkar kadrların hazırlanmasını təmin etməkdir.

Tədbirdə iştirak edən, dünyanın nüfuzlu universitetlərində təhsil alacaq bir qrup gənc “Azərbaycan müəllimi”nə həm görüş təəssüratlarını, həm də proqrama qəbulla bağlı fikirlərini, proqramın əhəmiyyəti barədə fikirlərini bölüşdülər.

“500 nəfərin tam təminatlı nüfuzlu universitetlərdə təhsil almasına dəstəyin göstərilməsi dünyada çox az rast gəlinən nümunələrdəndir”

Orxan Məmmədli: "Harvard Universitetinin Kennedi Məktəbində Dövlət İdarəetməsi üzrə magistr səviyyəsində təhsil alacağam. 
Dövlət Proqramına qəbul ilə əlaqədar olaraq, ilk növbədə, məlumatlandırıcı SMS aldım. Burada portal.edu.az portalında açılmış olan şəxsi kabinetin yoxlanılmasına dair təlimat mövcud idi. Təlimata uyğun olaraq şəxsi kabineti yoxladıqda isə artıq proqrama müraciətə dair nəticənin bəlli olduğunu gördüm və burada mənim nəticəm müsbəti idi. Əlbəttə ki, həmin anlar sevincli anlar idi. 

İxtisasım bir çox sahələri əhatə edəcək. Bunlardan xüsusilə strateji planlaşdırma və idarəetmə, rəqəmsal idarəetmə və innovasiya, iqtisadi siyasət və makroiqtisadi idarəetmə, dövlət maliyyəsi və resursların idarə olunması, dayanıqlı inkişaf siyasəti, sosial siyasət və rifah sistemlərini vurğulmaq istərdim. Bu sahələr ölkəmiz üçün uzunmüddətli milli inkişaf proqramlarının hazırlanması və tətbiqi, dövlət xidmətləri üzrə rəqəmsal transformasiyanın daha da genişləndirilməsi, innovasiya ekosisteminin inkişafı, milli iqtisadiyyatın rəqabəqabiliyyətliyinin daha da gücləndirilməsi, dövlət resurslarının effektiv idarə olunması, yaşıl iqtisadiyyatın inkişafı, dayanıqlı sosial-iqtisadi inkişafın təmin edilməsi baxımından həm cari, həm gələcək perspektivdə faydalı olacaqdır.  
Dövlət Proqramının gənclər üçün əhəmiyyətli roluna gəlincə, qeyd edim ki, bütün dünyada beynəlxalq səviyyədə müxtəlif təqaüd proqramları olsa da, ölkə miqyasında bu həcmdə, yəni, ardıcıl 7 il ərzində hər il 3 ayrı-ayrı təhsil pilləsi üzrə ümumilikdə 500 nəfərin tam təminatlı nüfuzlu universitetlərdə təhsil almasına dəstəyin göstərilməsi çox az rast gəlinən nümunələrdəndir. Bu baxımdan gənclər üçün belə bir imkanın yaradılmasının həm onların şəxsi inkişafı, həm də ölkəmizin gələcəyi üçün əhəmiyyəti olduqca yüksədir. Gənclərin özü üçün faydalarını qeyd etsəm, bunlardan dünyanın ən nüfuzlu universitelərində təhsil almaq və bununla qlobal miqyasda bilik, bacarıq və peşəkar şəbəkəyə çıxışın əldə edilməsini, müxtəlif ölkələrin iqtisadi, biznes, sosial və mədəni təcrübələrinin öyrənilməsini və bunların nəticəsində gənclərin öz potensiallarının maksimal inkişafına nail olunmasını qeyd edə bilərəm. 

Bütün bunlara hər bir təhsil pilləsi üzrə uğurla nail olmaq üçün isə əlbəttə ki əhəmiyyətli həcmdə maliyyə və insan resursları tələb olunur.
Bu mənada proqramın Azərbaycan Respublikası Dövlət Neft Fondu tərəfindən maliyyələşdirilməsi və Dövlət Proqramının İdarəetmə Qrupu (DPİQ) tərəfindən isə bütün proseslərin təşkili və təmin edilməsi dövlətin ən bariz qayğısıdır. Xüsusilə, proqramın şəffaf aparılması, seçim sonrası və təhsil müddətində gənclərə sonsuz texniki, inzibati və aidiyyəti məsələlər üzrə dəstəyin göstərilməsi, məzun olduqdan sonra iş imkanları ilə bağlı kommunikasiyanın təşkil edilməsi dövlətin digər əhəmiyyətli qayğılarındadır.

Bugünkü orientasiya görüşünə gəlincə qeyd edim ki, ümumiyyətlə, tədbirin 2 hissədə - təqdimat və sual-cavab formatında aparılması düşünürəm ki, proqrama dair bütün məqamlarla tanış olmaq, onları aydınlaşdırmaq üçün kifayət qədər faydalı yanaşmadır. Bu tədbir nəticəsində tələbələr istər təhsil öncəsi, istərsə də təhsil dövründə onlara lazım olan bütün növ dəstəyi vaxtlı-vaxtında əldə etmək imkanına sahib olacaqlar. 

Sonda mütləq qeyd etməliyəm ki, Dövlət Proqramının İdarəetmə Qrupu Dövlət Proqramına müraciətin ilk günlərindən bugünkü tədbirə qədər tələbələrə daima, yorulmadan dəstək göstərən, əllərindən gələni etdiklərini görmüşəm. Odur ki, onlara, həm öz adımdan, həm digər tələbələr adından təşəkkür edir və minnətdarlığımı bildirirəm. İşlərində isə daima uğurlar, yorulmaz fəaliyyət arzu edirəm".

“Qəbul xəbərini alanda çox sevindim”

Murad Alməmmədov: “Kembric Universitetində siyasət və beynəlxalq münasibətlər üzrə magistr təhsili alacağam. Bundan əvvəl isə Azərbaycan Respublikasının Prezidenti yanında Dövlət idarəçilik Akademiyasında Siyasi idarəetmə fakültəsində “Politologiya” ixtisası üzrə bakalavr təhsili almışam. Dövlət Proqramına qəbul olunmağım barədə xəbəri alanda axşam tərəfi idi, ailəmlə dəniz kənarında idik. Qəbul xəbərini alanda çox sevindim. Kembric Universitetində “Enerji siyasəti” ixtisası üzrə təhsilimi davam etdirəcəyəm. Bu sahə, heç şübhəsiz, günümüzün ən aktual və perspektivli istiqamətlərindən biridir. Xüsusilə Qarabağ regionunun yaşıl enerji potensialını nəzərə alsaq, düşünürəm ki, olduqca lazımlı və gələcək yönümlü sahədir. 

Ümumiyyətlə, dünya miqyasında bu qədər əhatəli, yəni həm geniş maddi təminat, həm də ölkəyə qayıtdıqdan sonra iş imkanı ilə tam təmin edən çox az sayda təqaüd proqramı var. Və belə bir proqramın olması ölkəmizdə dövlətin  gənclərə və onların təhsilinə verdiyi böyük dəyərin təzahürüdür. Bugünkü tədbir də kifayət qədər əhatəli və effektli bir görüş oldu".

“Uzun zamandır gözlədiyim xəbəri aldım” 
Aytən Sədirova: Mən DP çərçivəsində Stanford Universitetində “Elektrik mühəndisliyi” ixtisası üzrə magistratura təhsil alacağam. Telefonuma DP-dən mesaj gəldi və həmin dəqiqə portalı yoxladım. Cavabın müsbət olduğunu görəndə isə böyük sevinc hissi keçirdim, uzun zamandır gözlədiyim xəbər idi.
Düşünürəm ki, texnologiya və mühəndisliyin sürətlə inkişaf etdiyi bir dövrdə ölkəmizdə bu sahələr üzrə mütəxəssislərin çox olması vacibdir. “Elektrik mühəndisliyi” ixtisası avtomatlaşdırma, enerji sistemləri, süni intellekt və s. kimi sahələrlə də əlaqəlidir. Bunlar ölkəmizdə enerji səmərəliliyinin artırılması və dayanıqlı inkişaf istiqamətləri üçün də olduqca perspektivlidir. 

Dövlət Proqramı gənclərin dünyanın aparıcı universitetlərində təhsil alaraq müasir bilik və bacarıqlara yiyələnməsinə imkan verir. Bu, gənclər üçün çox böyük bir fürsətdir. 
Tədbir olduqca faydalı keçdi, xaricdə təhsil alacağımız zaman diqqət etməli olduğumuz məqamlar barədə ətraflı məlumat verildi. Digər proqram iştirakçıları ilə tanış olmaq tədbirin maraqlı tərəflərindən biri idi".

“Həyatımın ən önəmli və qürurlu anlarından biri”

Sənan Əliyev: Bakı Dövlət Universitetinin Hüquq fakültəsinin bakalavr pilləsini Prezident təqaüdçüsü kimi fərqlənmə diplomu ilə başa vurmuşam. 2025/2026-cı tədris ilində magistratura təhsilimi Amerika Birləşmiş Ştatlarının Nyu-York şəhərində yerləşən Kolumbiya Universitetinin Hüquq fakültəsində, yəni “Columbia Law School”da davam etdirəcəyəm. 

Dövlət Proqramına qəbul olunmağımla bağlı məlumatı imeyl vasitəsilə aldığımda sevinc hissləri keçirərək, ilk növbədə, bu yolda mənə dəstək olan yaxınlarımla xəbəri bölüşdüm. 

Həqiqətən də, Dövlət Proqramının iştirakçısı olmaq və dünyanın ən nüfuzlu universitetlərindən birində Vətənimi təmsil etmək imkanı qazanmaq həyatımın ən önəmli və qürurlu anlarından biri oldu.
Təhsilimi davam etdirəcəyim ixtisas, əsasən, beynəlxalq hüquq normalarının implementasiyası, beynəlxalq məhkəmələrin yurisdiksiyası, kibercinayətkarlıq və terrorçuluqla mübarizəyə dair sahələri əhatə edəcək. Hesab edirəm ki, bu istiqamətlərdə qabaqcıl dövlətlərin yanaşmalarını, eləcə də ən yaxşı beynəlxalq təcrübələri öyrənərək onların ölkəmizdə tətbiqinə nail olmaq, eləcə də beynəlxalq əməkdaşlıq imkanlarını genişləndirmək hüquq sistemimizin inkişafı baxımından mühüm əhəmiyyət kəsb edir.

Proqramın gənclər üçün əhəmiyyəti və dövlət qayğısı barədə onu deyə bilərəm ki, Azərbaycan Respublikası Prezidentinin Sərəncamı ilə təsdiq edilmiş “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı”, həqiqətən də, perspektivli gənclərin öz bilik və bacarıqlarını inkişaf etdirməsi baxımından geniş imkanlar yaradır. Bu proqram dövlətimizin gənclərin təhsilinə, onların peşəkar kadr kimi formalaşmasına və beynəlxalq mühitdə rəqabətədavamlı olmalarına verdiyi önəmin bariz nümunəsidir.

Bugünkü tədbir Dövlət Proqramı iştirakçılarını maraqlandıran sualların səsləndirilməsi və birbaşa Dövlət Proqramını İdarəetmə Qrupunun əməkdaşları tərəfindən cavablandırılması baxımından çox faydalı oldu. Tədbirin təşkilatçılarına və Dövlət Proqramını İdarəetmə Qrupunun əməkdaşlarına öz təşəkkürümü bildirirəm.

“Dövlət Proqramı gənclər üçün böyük imkanlar yaradır”

Səma Məmmədova: “Mən ABŞ-də Yale Universitetində “Qrafik dizayn” ixtisası üzrə magistratura təhsili alacağam. Proqrama qəbul olunmağım barədə xəbəri sms bildirişi vasitəsilə aldım. Məktubu oxuyanda çox həyəcanlandım və qürur hissi keçirdim. Bu, illərlə üzərində çalışdığım bir məqsəd idi, ona görə də həmin an mənim üçün çox emosional oldu.

Qrafik dizayn sahəsi təkcə vizual estetika ilə deyil, həm də sosial, mədəni və iqtisadi mövzularla sıx bağlıdır. Bu sahə ölkəmizdə həm yaradıcılıq sənayelərinin, həm də mədəni irsin qorunması və tanıdılması baxımından böyük potensiala malikdir. Əldə edəcəyim bilik və bacarıqları Azərbaycanda dizayn təhsili, mədəni layihələr və sosial mövzulu vizual kommunikasiya sahələrində tətbiq etməyi planlaşdırıram.

Xaricdə təhsil üzrə Dövlət Proqramı gənclər üçün böyük imkanlar yaradır. Bu, təkcə fərdi inkişaf deyil, həm də ölkəmizin insan kapitalının gücləndirilməsi baxımından əhəmiyyətlidir. Dövlətin gənclərə bu cür dəstək göstərməsi onların beynəlxalq arenada rəqabət qabiliyyətini artırır və yeni bilikləri ölkəyə gətirməsinə şərait yaradır. 

Bugünkü orientasiya tədbiri çox faydalı oldu. Proqramın prosedurları, təqaüdün şərtləri və xaricdə yaşayışla bağlı praktiki məlumatlar əldə etdik. Eyni zamanda digər təqaüdçülərlə tanış olmaq, təcrübə mübadiləsi aparmaq da çox dəyərli idi.