Zoologiya İnstitutunun əməkdaşlarının məqaləsi nüfuzlu jurnalda dərc edilib

Zoologiya İnstitutunun əməkdaşlarının məqaləsi nüfuzlu jurnalda dərc edilib

ETN Zoologiya İnstitutunun baş direktoru a.e.d., dosent Ələddin Eyvazov, Parazitologiya laboratoriyasının b.e.d., dosent Əli Nəsirov və b.ü.f.d., dosent Fuad Rzayevin həmmüəlliflikləri ilə “Web of Science” və “Scopus” bazalarında indekslənən və Q1 kvartelli nüfuzlu “Elsevier” nəşriyyat evi tərəfindən dərc edilən “Veterinary Parasitology” jurnalında “Ultrastructural characterization of bioaccumulation and migration of Ag nanoparticles in host-parasite organisms” adlı məqalə nəşr olunub.

İnstitutdan “Azərbaycan müəllimi”nə bildirilib ki, son illərdə metal nanohissəciklərinin biologiya və tibb sahəsində istifadə olunması geniş vüsət alıb. Bununla yanaşı, nanotexnologiyaların inkişaf etdiyi bir dövrdə ekosistemin müxtəlif komponentlərində nanohissəciklərin bioakkumulyasiyası və miqrasiyasının, onların canlı orqanizmlərdə yaratdığı müxtəlif dərəcəli patologiyaların öyrənilməsi vacib məsələlərdən hesab olunur. Hazırkı məqalədə nanohissəciklərin ev qazlarında və onların parazitlərində in vivo şəraitində bioakkumulyasiyası və miqrasiyası işıq və elektron mikroskopik üsulların köməkliyi ilə tədqiq edilib. Gümüş nanohissəciklər (AgNPs) H. dispar nematodu ilə yoluxmuş quşlara 100μg/ml konsentrasiyada tətbiq edilib. Müəyyən olunub ki, AgNP-lərin sərbəst vəziyyətdə ölçüləri 9,03-23,82 nm (13,88±0,48nm), parazit orqanizmdə isə 14 nm, quşlarda isə 13 nm-dən artıq deyildir. Nanohissəciklər helmintin orqanizmində ciddi patoloji dəyişikliklər yaratmaqla onun məhvinə səbəb olub. AgNP təsiri nəticəsində sahibin bağırsaq, qaraciyər və eninəzolaqlı əzələlərində ultrastruktur səviyyədə dəyişikliklər müşahidə edilib. Hissəciklər qazın bağırsaqlarının selikaltı qatında olan damarların mənfəzində yerləşən eritrositlərin sitoplazmasına daxil olmaqla qaraciyər və eninəzolaqlı əzələlərə doğru miqrasiya etməklə orada toplanıblar. Alınan nəticələr əsasən, hazırlanan yeni antihelmint preparatlarının nanohissəciklər vasitəsilə daşınmasında istifadə oluna bilər.