BSU-da doktoranturaya qəbul imtahanı ilə bağlı koordinasiya görüşü keçirilib

BSU-da doktoranturaya qəbul imtahanı ilə bağlı koordinasiya görüşü keçirilib

Avqustun 27-də Bakı Slavyan Universitetində (BSU) fəlsəfə fənni üzrə doktoranturaya qəbul imtahanlarına hazırlıq məqsədilə 13 ali təhsil və 1 elm müəssisəsindən olan namizədlərlə koordinasiya görüşü keçirilib. 

BSU-dan “Azərbaycan müəllimi”nə bildirilib ki, görüş 2–5 sentyabr tarixlərində mərkəzləşdirilmiş qaydada baş tutacaq imtahanların yüksək təşkilati səviyyədə keçirilməsinə hazırlığın mühüm mərhələsi kimi qiymətləndirilir.

Görüşdə BSU-nun rektoru, imtahanın təşkilində iştirak edəcək məsul şəxslər və imtahan verəcək namizədlər iştirak ediblər.

Görüşdə çıxış edən BSU-nun rektoru Anar Nağıyev doktoranturaya qəbul prosesində ədalətlilik və qərəzsizliyin qorunmasının mühüm prinsip olduğunu vurğulayıb. O, qiymətləndirmə meyarları, imtahan prosesində yerinə yetirilməli olan qaydalar və digər təşkilati prinsiplər barədə ətraflı məlumat verib.

Rektor qeyd edib ki, doktoranturaya qəbul imtahanlarının əsas məqsədi biliklərin yoxlanılması ilə kifayətlənmir, həm də ölkənin gələcək elmi potensialının formalaşdırılmasında mühüm mərhələsidir. 

“Bu imtahanlar vasitəsilə biz yalnız yeni doktorantları seçmirik, həm də Azərbaycanın elmi gələcəyini formalaşdırırıq. Gənc tədqiqatçıların elmə gətirəcəyi yeni ideyalar, innovativ yanaşmalar və araşdırmalar ölkənin intellektual inkişafına mühüm töhfə verəcək”, – deyə rektor Anar Nağıyev bildirib. 

Rektor qəbul imtahanlarında və tədqiqatçılıq fəaliyyətlərində bütün namizədlərə uğurlar arzulayıb.

Görüş zamanı namizədlərin sualları dinlənilib, onların qarşılaşa biləcəyi texniki və metodoloji məsələlərə aydınlıq gətirilib. İddiaçılara imtahanın gedişatı ilə bağlı bütün mərhələlər izah edilib və imtahan prosesinə aid yaddaş kitabçaları və digər materiallar təqdim olunub.

Koordinasiya görüşü namizədlərdə əlavə motivasiya yaradıb və onları qarşıdakı imtahan mərhələsinə daha inamlı şəkildə hazır olması üçün vacib mərhələ olduğu hesab olunub.

Qeyd edək ki, Bakı Slavyan Universitetində fəlsəfə fənni üzrə Elm və Təhsil Nazirliyinin (ETN) müvafiq əmri ilə 13 ali təhsil müəssisəsi və Nizami Gəncəvi adına Azərbaycan Milli Ədəbiyyat Muzeyindən 157 nəfər namizədlərin doktoranturaya qəbul imtahanları 2–5 sentyabr 2025-ci il tarixlərində mərkəzləşdirilmiş qaydada keçiriləcək.