MDU-nun 4 proqramı beynəlxalq standartlar üzrə qiymətləndiriləcək

MDU-nun 4 proqramı beynəlxalq standartlar üzrə qiymətləndiriləcək

Mingəçevir Dövlət Universitetinin 4 proqramı beynəlxalq akkreditasiya mərhələsinə qədəm qoyur. 

“Azərbaycan müəllimi” xəbər verir ki, universitetin “Turizm işinin təşkili”, “Maliyyə”, “Energetika mühəndisliyi” və “İnformasiya texnologiyaları” ixtisasları keyfiyyət göstəricilərinə görə beynəlxalq ekspertlər tərəfindən qiymətləndiriləcək. 

MDU-nun rektoru Anar Eminov bildirib ki, bu addım ali təhsil müəssisəsinin tədris prosesini dünya standartlarına uyğunlaşdırmaq və rəqabətqabiliyyətini artırmaq məqsədi daşıyır. Akkreditasiya həmçinin tələbələrin beynəlxalq əmək bazarında daha geniş imkanlara sahib olmasına şərait yaradacaq: “Mütəxəssislər proqramların tədris planını, müəllim heyətinin hazırlığını, infrastruktur və elmi fəaliyyətini hərtərəfli təhlil edəcəklər. Prosesin nəticələri universitetin keyfiyyət təminatı sistemini gücləndirəcək. Bu həm də xarici universitetlərlə əməkdaşlığın genişlənməsinə və tələbə-müəllim mübadiləsinin daha da intensivləşməsinə yol açacaq”. 

Beynəlxalq akkreditasiyanın ali məktəbin strateji inkişaf planında xüsusi yer tutduğunu qeyd edən rektorun sözlərinə görə, proqramların uğurla qiymətləndirilməsi MDU-nun beynəlxalq reytinqlərdə mövqeyini möhkəmləndirəcək: “Bizim əsas məqsədimiz tələbələrə ən müasir bilik və bacarıqları təqdim etmək, onların həm ölkə daxilində, həm də beynəlxalq əmək bazarında rəqabətqabiliyyətini təmin etməkdir. Bu proses həm universitetin nüfuzunu artıracaq, həm də regionun inkişafına öz töhfəsini verəcək”.