Komitə sədri: Muxtar respublikada 2122 sağlamlıq imkanları məhdud uşaq var

Komitə sədri: Muxtar respublikada 2122 sağlamlıq imkanları məhdud uşaq var

“Muxtar respublika üzrə 2122 sağlamlıq imkanları məhdud uşaq vardır ki, bu uşaqların da 21.2%-i və ya 450 nəfəri Babək rayonunun payına düşür. Maarifləndirmə tədbirləri çərçivəsində uşaqların hüquqları, gender bərabərliyi və ailə dəyərləri ilə bağlı interaktiv müzakirələr və təlimlər həyata keçirilir”.

“Azərbaycan müəllimi” xəbər verir ki, bu barədə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin və Naxçıvan Dövlət Universitetinin birgə təşkilatçılığı ilə Babək rayonunun Kültəpə kəndində “Reproduktiv sağlamlıq və ailə dəyərləri” mövzusunda keçirilən maarifləndirici tədbirdə komitə sədri Ramilə Seyidova deyib. 

O bildirib ki, komitə fəaliyyət göstərdiyi dövrdə muxtar respublikanın kəndlərinin 70–80%-ində əhalinin maarifləndirilməsi məqsədilə tədbirlər təşkil edib. Bu tədbirlərin əsas məqsədi erkən nikah və qohum evlilik hallarının qarşısını almaq, təhsildən kənarda qalan uşaqların sayını azaltmaq və uşaq hüquqları barədə ictimai məlumatlılığı artırmaqdır: “Erkən nikahın və qohum evliliyinin qarşısının alınması üçün yerlərdə ailələr, məktəblər və ictimai təşkilatlarla sıx əməkdaşlıq qurulub. Təhsildən kənarda qalan uşaqların yenidən təhsil sisteminə cəlb olunması üçün tədbirlər görülür, valideynlər və təhsil müəssisələrinin rəhbərləri ilə maarifləndirici görüşlər təşkil olunur. Sağlamlıq imkanları məhdud uşaqların cəmiyyətə inteqrasiyası diqqət mərkəzində saxlanılır, onların tibbi, psixoloji və sosial dəstəklə təmin olunması üçün müxtəlif layihələr icra edilir”.  

Qeyd olunub ki, bu uşaqların erkən diaqnostikası və reabilitasiya tədbirlərinin vaxtında həyata keçirilməsi onların cəmiyyətə inteqrasiyası və funksional inkişafı baxımından olduqca vacibdir.