Mikayıl Cabbarov: Yüksək performanslı hesablama imkanları bilik mübadiləsini genişləndirəcək

Mikayıl Cabbarov: Yüksək performanslı hesablama imkanları bilik mübadiləsini genişləndirəcək

“Yüksək performanslı hesablama imkanlarının yalnız dövlət qurumlarına deyil, həm də özəl sektor, akademiya və vətəndaş cəmiyyətinə artırılması bilik mübadiləsini genişləndirəcək, proqnozlaşdırmanı yaxşılaşdıracaq və faktlara əsaslanan qərarverməni gücləndirəcək”.

“Azərbaycan müəllimi” xəbər verir ki, bu sözləri bu gün Bakıda “PAŞA Holding”in təşkilatçılığı ilə keçirilən beynəlxalq “INMerge” İnnovasiya Sammitində (INMerge Innovation Summit 2025) iqtisadiyyat naziri Mikayıl Cabbarov deyib.

Nazirin sözlərinə görə, bu addımlar Azərbaycanın innovasiyaya əsaslanan inkişaf strategiyasını irəli aparacaq və ölkənin qlobal rəqabət qabiliyyətini yeni mərhələyə yüksəldəcək.

Mikayıl Cabbarov əlavə edib ki, sabah sammit çərçivəsində “Sənaye 4.0 və Əşyaların İnterneti” mövzusunda ayrıca sessiya keçiriləcək.

Onun sözlərinə görə, ötən il gündəmə gətirilən maliyyə ekosisteminin tənzimləmə və kapitala çıxış baxımından inkişafı istiqamətində də irəliləyişlər var: “Artıq maliyyə tənzimləyicisi bu istiqamətdə müəyyən addımlar atıb. Növbəti sammitədək müvafiq qanunvericilik bazası və inkişaf infrastrukturu üzrə nəticələrin təqdim olunacağını gözləyirik”.