NDU-nun nümayəndə heyəti III Beynəlxalq Tibbi Forumda iştirak edib

NDU-nun nümayəndə heyəti III Beynəlxalq Tibbi Forumda iştirak edib

Sentyabrın 24-26-da Səmərqənd Dövlət Tibb Universiteti, Naxçıvan Dövlət Universiteti, Azərbaycan Tibb Universiteti, Azərbaycan Endoskopik-Laparoskopik Cərrahlar Cəmiyyətinin birgə təşkilatçılığı, türkdilli dövlətlərin tibb təhsili həyata keçirən bir sıra universitetləri, dərnək və cəmiyyətlərinin iştirakı ilə Özbəkistan Respublikasının Səmərqənd şəhərində III Beynəlxalq Tibbi Forum keçirilib. 

“Azərbaycan müəllimi” xəbər verir ki, III Tibbi Forumda Naxçıvan Dövlət Universitetinin elm və innovasiya məsələləri üzrə prorektorunun rəhbərliyi ilə nümayəndə heyəti iştirak edib, plenar iclasda və bölmə iclaslarında məruzələrlə çıxışlar dinlənilib. 

Forum müddətində universitetin nümayəndə heyətinin Səmərqənd Dövlət Tibb Universitetinin Tibb və Stomatologiya fakültələri ilə görüşləri olub, həmçinin Səmərqənd şəhərinin tarixi elm-mədəniyyət mərkəzlərinə ekskursiyaları təşkil edilib.

III Tibbi Foruma müxtəlif türkdilli dövlətlərin 30-dan çox universitetindən 200-dək tədqiqatçı alim qatılıb. Konfransın açılış tədbirindən sonra keçirilən bölmə iclasları ilə yanaşı, forumun profilinə uyğun olaraq yüksəkixtisaslı həkimlər tərəfindən ənənəvi olaraq bir sıra cərrahi əməliyyatlar həyata keçirilib. Ödənişsiz təşkil edilən aksiyalar Azərbaycandan və digər türkdilli ölkələrdən gəlmiş həkim heyətləri tərəfindən aparılıb.

Konfransda diqqət çəkən ən mühüm cəhətlərdən biri bölmə iclasları zamanı canlı əməliyyatların həyata keçirilməsi və konfrans iştirakçılarına əməliyyat əsaslı təqdimatlar olub.

Qeyd edək ki, əsası 2022-ci ildə Naxçıvan Dövlət Universitetində qoyulan Tibbi Forum ilk dəfə Naxçıvan şəhərində, 2024-cü ildə isə Türkiyə Respublikasının İstanbul şəhərindəki Yeditəpə Universitetində keçirilib. Bundan sonra forum Türk Dövlətləri Tibbi Forumu adı altında fəaliyyətini davam etdirib.