187 nəfərə elmi ad verilib, 45 adın verilməsindən imtina edilib

Azərbaycan Respublikası Prezidentinin yanında Ali Attestasiya Komissiyası 2025-ci il ərzində elmi adların verilməsi və ya verilməsindən imtina olunması ilə bağlı statistik məlumatları açıqlayıb.

“Azərbaycan müəllimi” xəbər verir ki, ötən il  187 nəfərə elmi ad verilib, 45 nəfərə isə elmi adın verilməsindən imtina edilib.
2025-ci ildə müxtəlif elm sahələri üzrə 146 nəfərə dosent, 41 nəfərə professor elmi adı verilib. Eyni zamanda 38 dosent, 7 professor elmi adının verilməsindən imtina edilib.

Statistikaya əsasən, dosent elmi adının verilməsi üzrə ən yüksək göstərici filologiya elmləri (29), texnika elmləri (20), iqtisad elmləri (15) və kimya elmləri (15) sahələrində qeydə alınıb. Professor elmi adı isə daha çox texnika elmləri (9), iqtisad elmləri (8) və tibb elmləri (4) üzrə verilib.

Dosent elmi adından imtinalar ən çox tarix (7), biologiya elmləri (6) və filologiya elmləri (6) sahələrində müşahidə olunub. Professor elmi adı üzrə imtinalar isə əsasən biologiya elmləri, fizika, tibb elmləri, sənətşünaslıq, pedaqogika, milli təhlükəsizlik və hərbi elmlər sahələrində qeydə alınıb.