Artıq diplomlar 10 günə hazır olacaq

“Nazirlər Kabinetinin qərarlarına uyğun olaraq, artıq təhsil sənədləri – attestatlar, diplomlar və sertifikatlar elektron qaydada təqdim olunacaq və kağız daşıyıcılarda verilməyəcək”.

“Azərbaycan müəllimi” xəbər verir ki, bunu Elm və Təhsil Nazirliyinin Təhsil Sisteminin İnformasiyalaşdırılması İdarəsinin rəisi Vüsal Xanlarov “Təhsilin rəqəmsallaşması” mövzusunda keçirilən brifinqdə deyib.

O bildirib ki,  hazırda keçid dövrü tətbiq edilir. Bu müddət ərzində müəyyən səbəblərdən sənədə təcili ehtiyacı olan tələbə və şagirdlər hələlik sənədlərini kağız formatında əldə edə bilərlər. Lakin cari tədris ili başa çatdıqdan sonra bütün təhsil sənədləri yalnız elektron formada təqdim ediləcək.

İdarə rəisi vurğulayıb ki, elektron sənədlərin verilməsi daha operativ şəkildə həyata keçiriləcək: “Əvvəllər məzunlar, xüsusilə ali təhsil pilləsində, diplomları aylarla gözləməli olurdular. Yeni qaydalara əsasən isə son qiymətlər sistemə daxil edildikdən sonra maksimum 10 gün ərzində sənədlər Elektron Hökumət İnformasiya Sistemində əks olunacaq”.

Onun sözlərinə görə, vətəndaşlar sənədlərini "myGov" platforması vasitəsilə əldə edə biləcəklər. Elektron sənədlərin yoxlanılması daha rahatdır və bu, saxtalaşdırma hallarının qarşısını almağa imkan verir. Eyni zamanda sənədlərin təqdim olunma müddəti əhəmiyyətli dərəcədə qısalacaq.