AzMİU və POLİMİ arasında ikili diplom proqramının tələbələri məzun olublar

AzMİU və POLİMİ arasında ikili diplom proqramının tələbələri məzun olublar

Azərbaycan Memarlıq və İnşaat Universiteti (AzMİU) ilə İtaliyanın nüfuzlu ali təhsil müəssisələrindən biri olan Milan Politexnik Universiteti (POLİMİ) arasında bakalavr pilləsində dizayn ixtisası üzrə həyata keçirilən ikili diplom proqramının 5 tələbəsindən 3-ü proqramı uğurla tamamlayıb.

“Azərbaycan müəllimi” xəbər verir ki, proqramı uğurla bitirən 2025-ci il məzunları Məryəm Əzizova, Ülviyyə Seyidzadə və Nigar Mahmudovadır. Onlar tədris müddətində həm nəzəri biliklər, həm də praktik layihələr üzrə yüksək nəticələr göstərərək proqramın tələblərinə tam şəkildə cavab veriblər.

Məzunlardan Məryəm Əzizova təhsilini İtaliyanın 110 ballıq qiymətləndirmə sistemi üzrə maksimal göstərici – 110 bal ilə başa vurub. O, təhsil müddətində moda nümayişləri və yaşayış məkanlarının interyer dizaynı üzrə layihələr hazırlayıb.

Ülviyyə Seyidzadə və Nigar Mahmudova da proqramı yüksək göstəricilərlə tamamlamağı bacarıb. Belə ki, Ülviyyə Seyidzadə 107/110, Nigar Mahmudova isə 106/110 nəticə əldə edib. Ülviyyə Seyidzadənin “The Casa Tela” adlı layihəsi Borgoda yerləşən mədəni və bədii icmalar üçün funksional interyer məkanının dizaynına həsr olunub. Nigarın “Cultural Mosaic” adlı layihəsi isə Villa Arconati yaxınlığında yerləşən yaşayış məkanında mədəni müxtəlifliyin əks etdirilməsi məqsədilə hazırlanıb.

Tələbələr, eyni zamanda, təhsil müddətində beynəlxalq layihə və müsabiqələrdə də iştirak ediblər. Ülviyyə Seyidzadə və proqramın digər iştirakçısı Enira Abdullayeva “Sustainable Hospitality Challenge 2024” beynəlxalq müsabiqəsinin Avropa yarımfinal mərhələsinə vəsiqə qazanıblər. Ötən il onların təqdim etdiyi “Seashell Sanctuary” layihəsi çərçivəsində dəniz məhsulları və akvamarin sənayesindən əldə olunan qabıqlardan istifadə edilməklə, 20% təbii inqrediyentlərdən ibarət xüsusi beton formul yaradılıb. Həmin materialdan hamam aksesuarları, dekorativ elementlər, çanaq və vanna modelləri hazırlanıb. Layihə qonaqpərvərlik sahəsində plastikdən istifadənin və karbon emissiyalarının azaldılmasına yönəlib.

Qeyd edək ki, bu ikili diplom proqramı çərçivəsində məzunlar həm AzMİU, həm də POLİMİ tərəfindən təqdim edilən diplomları əldə edirlər.