AzMİU-nun 2 komandası Dünya Robototexnika Çempionatının finalına vəsiqə qazanıb

AzMİU-nun 2 komandası Dünya Robototexnika Çempionatının finalına vəsiqə qazanıb

Azərbaycan Memarlıq və İnşaat Universitetinin (AzMİU) Tələbə Elmi Cəmiyyətinin üzvlərindən ibarət “Phonix” və “Primetech” komandaları Dünya Robototexnika Çempionatının (WRC) beynəlxalq final mərhələsinə vəsiqə qazanıblar. Komandalar uğurla keçdikləri seçim mərhələləri nəticəsində iki aylıq tam təqaüdlü təlim proqramına da qəbul olunublar. 

“Azərbaycan müəllimi” xəbər verir ki, komandalar final mərhələsində "RoboSoccer" kateqoriyası üzrə mübarizə aparacaqlar. 

Bildirək ki, WRC – robototexnika, süni intellekt, mühəndislik və digər texnoloji sahələrdə innovativ gəncləri bir araya gətirən nüfuzlu beynəlxalq müsabiqədir. 16-30 yaş arası iştirakçıların qatıldığı bu yarışda gənclər komandalar şəklində öz yaradıcılıqlarını və texniki biliklərini nümayiş etdirmək imkanı qazanırlar.

Azərbaycan üzrə final mərhələsinin 7-8 iyun 2025-ci il tarixlərində Xankəndi və Bakıda keçirilməsi planlaşdırılır. Bu mərhələdə qalib gələn komandalar 21-24 avqust tarixlərində Hindistanın Delhi şəhərində təşkil olunacaq beynəlxalq finalda ölkəmizi təmsil edəcəklər.

Final mərhələsində iştirakçılar aşağıdakı kateqoriyalar üzrə bacarıqlarını sınayacaqlar:
– “Bots Combat” – Robot döyüşləri
– “RC Craft” – Uçuş aparatlarının dizaynı və idarə olunması
– “Drone Racing & Drone Soccer” – Dron yarışları və dron futbolu
– “RoboSoccer” – Robot futbol komandaları arasında yarışlar
– “Fastest Line Follower” – Avtonom robotların sürət testi