LDU “TələbəPlus” və “IELTS imtahanına təşviq” layihələrinə qoşulub

LDU “TələbəPlus” və “IELTS imtahanına təşviq” layihələrinə qoşulub

Təhsilin İnkişafı Fondunun nümayəndə heyəti Lənkəran Dövlət Universitetində müəllim və tələbələrlə görüş keçirib.

Universitetdən “Azərbaycan müəllimi”nə bildirilib ki, görüşün məqsədi Fondun fəaliyyəti, həyata keçirdiyi layihələr barəsində universitetin elmi-pedaqoji heyətinin, tələbələrinin məlumatlandırılması olub.

Lənkəran Dövlət Universitetinin rektoru, prof.Natiq İbrahimov universitetdə təhsilin modernləşdirilməsi istiqamətində son illərdə görülən çoxşaxəli işləri qonaqların diqqətinə çatdırıb. N.İbrahimov Təhsilin İnkişafı Fondunun gördüyü işləri yüksək qiymətləndirərək, Fond ilə əməkdaşlığın Lənkəran Dövlət Universiteti üçün faydalı olacağını bildirib.

Tədbirin gedişatında Təhsilin İnkişafı Fondunun fəaliyyətinə dair videoçarx izlənilib.

Təhsilin İnkişaf Fondunun İdarə Heyətinin sədri Elnur Nəsibov çıxışında son illərdə Lənkəran Dövlət Universitetində aparılan dəyişikliklərin, yeniliklərin təhsil ictimaiyyətini sevindirdiyini deyib və buna görə də rektor Natiq İbrahimova, eləcə də, LDU kollektivinə öz təşəkkürünü bildirib. “TələbəPlus” layihəsi barədə təqdimatla çıxış edən E.Nəsibov tələbələrin sözügedən layihə və digər layihələrlə bağlı suallarını cavablandırıb.

Görüşün yekununda “TələbəPlus” və “IELTS imtahanına təşviq” layihələri çərçivəsində birgə əməkdaşlıq müqavilələri imzalanıb.