Mingəçevir Dövlət Universitetində 2025/2026-cı tədris ilinin payız semestrinin imtahan sessiyasına hazırlıq işləri yekunlaşıb

Mingəçevir Dövlət Universitetində 2025/2026-cı tədris ilinin payız semestrinin imtahan sessiyasına hazırlıq işləri yekunlaşıb

Mingəçevir Dövlət Universitetində 2025/2026-cı tədris ilinin payız semestrinin imtahan sessiyasına hazırlıq işləri yekunlaşıb. Azərbaycan Respublikası Elm və Təhsil Nazirliyinin müvafiq əmrinə əsasən təşkil olunacaq imtahan sessiyasının Mingəçevir Dövlət Universitetində 2025-ci ilin 5 yanvar tarixindən etibarən başlanması nəzərdə tutulur.
Payız imtahan sessiyasında universitet üzrə ümumilikdə 5500-dən çox tələbə və magistrant iştirak edəcək. Sessiya çərçivəsində 1300-dən artıq imtahanın keçirilməsi planlaşdırılır.
İmtahanlar yazılı, şifahi (video qeydiyyatla), test və seçilmiş fənlər üzrə pilot olaraq yazılı-elektron formatda təşkil ediləcək. Ümumilikdə 20-dən çox fənn üzrə elektron imtahan modeli tətbiq olunacaq ki, bu da universitetdə rəqəmsal qiymətləndirmə mexanizmlərinin genişləndirilməsi baxımından mühüm addımdır.
Elektron imtahan modelinə hazırlıq çərçivəsində:
•    yazılı-elektron imtahanların sınaq mərhələləri xüsusi portal üzərindən həyata keçirilib,
•    elektron bilet seçimi mexanizmi tətbiq olunub,
•    imtahan nəzarətçiləri və texniki heyət üçün təlimatlandırma işləri aparılıb.
İmtahanların şəffaf və operativ təşkili məqsədilə Operativ Qərargah, İmtahan Mərkəzi və Apellyasiya Komissiyası fəaliyyət göstərəcək, bütün imtahan prosesləri audio-video qeydə alınacaq. Həmçinin, Qaynar Xətt nömrəsi (0-104-103-103) tələbə və magistrantlardan gələn müraciətləri qəbul edəcək. 
Maddi-texniki bazanın gücləndirilməsi istiqamətində görülən işlər çərçivəsində:
•    universitet üzrə kompüterlərin sayı 493-ə çatdırılıb,
•    4 müasir imtahan mərkəzi yaradılıb,
•    internet sürəti 350 Mbit/s səviyyəsinə yüksəldilib,
•    imtahan zallarında Wi-Fi, kamera və rəqəmsal nəzarət sistemləri tam təmin olunub.
Görülən kompleks tədbirlər imtahan sessiyasının obyektiv, şəffaf və müasir tələblərə uyğun şəkildə keçirilməsinə xidmət edir.
Mingəçevir Dövlət Universitetinin rəhbərliyi bütün tələbə və magistrantlara qarşıdakı imtahanlarda uğurlar arzulayır.