Ankara Universitetinin dosenti AzMİU-da elmi seminar keçib

Ankara Universitetinin dosenti AzMİU-da elmi seminar keçib

Orhun Mübadilə Proqramı çərçivəsində Türkiyənin Ankara Universitetinin dosenti Tolgahan Ayantaş Azərbaycan Memarlıq və İnşaat Universitetində (AzMİU) elmi fəaliyyət göstərib.

Universitetdən “Azərbaycan müəllimi”nə bildirilib ki, İctimai fənnlər kafedrasına təhkim olunan qonaq alim universitet tələbələrinə multikulturalizm, sosiologiya və fəlsəfə fənləri üzrə mühazirələr oxuyub. Onun 26 sentyabrda təqdim etdiyi “Türkistan və Türkiyədə tarix yazımına yenidən baxış: ideoloji dəyişmələr və metodoloji yanaşmalar” mövzusunda seminar isə böyük maraqla qarşılanıb.

Seminar çərçivəsində Tolgahan Ayantaş tarix yazımında ideoloji yanaşmaların dəyişməsi, metodoloji əsasların formalaşması və Türk dünyasında tarixşünaslığın inkişaf mərhələləri ilə bağlı əhatəli elmi təhlillər aparıb. Məruzə həm nəzəri, həm də praktik baxımdan iştirakçılar üçün dəyərli olub. Tələbə və müəllimlər seminar zamanı geniş fikir mübadiləsi aparıb, ünvanlanan suallar isə alim tərəfindən ətraflı cavablandırılıb.

Universitet rəhbərliyi türkiyəli dosentə təşəkkürünü bildirərək, bu kimi elmi əməkdaşlıqların davam etdirilməsinin əhəmiyyətini xüsusi vurğulayıb.