“Dərsi deyim, çıxım gedim” yox, ruhlandırım, yol göstərim! – Qabaqcıl müəllimlərin təcrübələri

“Dərsi deyim, çıxım gedim” yox, ruhlandırım, yol göstərim! – Qabaqcıl müəllimlərin təcrübələri

Elm və təhsil naziri Emin Əmrullayev 5 Oktyabr - Beynəlxalq Müəllimlər Günü münasibətilə Naxçıvanın ümumtəhsil məktəblərinin bir qrup müəllimini “Fəxri fərmanla” təltif edib.

“Azərbaycan müəllimi” təltif olunan müəllimlərlə həmsöhbət olub.

“Şagirdlərimin nailiyyətlərini özümünkü hesab edirəm”

Bu müəllimlərdən biri Sədərək rayon Dəmirçi kənd orta məktəbin riyaziyyat müəllimi Elnurə Əhmədovadır. O, 1997-ci ildə Naxçıvan Dövlət Universitetinin riyaziyyat fakültəsini bitirib və elə həmin ildən Dəmirçi kənd tam orta məktəbində müəllim kimi fəaliyyətə başlayıb.

28 illik pedaqoji stajı olan müəllim deyir ki, “Fəxri fərmanla” təltif olunmaq çox qürurverici bir hissdir:

“İnsan öz zəhmətinin dəyərləndirildiyini görəndə daha da ruhlanır. Açığı, bunu gözləmirdim, amma həmin an sevinc və məsuliyyət hissini birlikdə yaşadım”.

Müəllimlik onun uşaqlıq arzularından biri olub:

“Mənim üçün müəllim yalnız bilik verən deyil, həm də insanın həyat yoluna işıq tutan şəxsdir. Bu peşəyə sevgim də məhz məktəb illərindən, müəllimlərimdən gördüyüm qayğı və diqqətdən qaynaqlanıb. Fəaliyyətim dövründə bir çox şagirdlərim uğurlara imza atıb, ali məktəblərə qəbul olunub. Onların nailiyyətlərini özümünkü hesab edirəm. Mənim ən böyük uğurum şagirdlərimin müvəffəqiyyətidir”.

“Həyati nümunələrlə izah üsullarını tətbiq edirəm”

Deyir ki, riyaziyyat bəzən çətin görünsə də, dərsləri daha sadə, həyati misallarla izah etməyə çalışır:

“Bu zaman uşaqlar fənni daha tez mənimsəyirlər. Əsasən şagird yönümlü metodlardan istifadə edirəm. Fənni daha asan qavramaları üçün qrup işi, sual-cavaba üstünlük verir, həyati nümunələrlə izah üsullarını tətbiq edirəm. Dəfələrlə şagirdlərim rayon və respublika miqyaslı olimpiadalarda uğur qazanıblar. Onlarla münasibətim səmimi və qarşılıqlı hörmət üzərində qurulub. Mən çalışıram ki, sinifdə həm müəllim, həm də dost olum. Bu, uşaqların dərsə marağını artırır. Müasir dövrdə texnologiya da böyük rol oynayır. İmkan daxilində kompüter, elektron təqdimatlar, test proqramları və müxtəlif riyazi tətbiqlərdən istifadə edirəm ki, dərslər həm əyləncəli, həm də daha aydın olsun. Düşünürəm ki, 21-ci əsrin müəllimi daim öz üzərində çalışan, yeniliklərə açıq, texnologiyadan istifadə edə bilən, şagirdə biliklə yanaşı, həyat dərsləri də verən bir şəxs olmalıdır. Müasir müəllim yalnız bilik ötürən deyil, həm də tərbiyəçi və yolgöstərən olmalıdır”.

Elnurə Əhmədova sertifikasiya prosesində də iştirak edib və ilk mərhələdə 55 bal toplayıb. Deyir ki, bu proses onun üçün böyük təcrübə olub:

“Hazırlıq mərhələsində çoxlu yeni biliklər qazandım və gələcəkdə daha yaxşı nəticə göstərəcəyimə inanıram. Daha çox interaktiv dərslərin keçirilməsini istəyirəm. Bu gün dərs prosesində şagirdin aktiv iştirakı çox vacibdir. İmkan olarsa, məktəbimizdə müasir laboratoriyanın qurulmasını və elektron təchizatın artırılmasını da görmək istərdim”.

Stajına görə qocaman sayılsa da, özünü gənc hiss edir və deyir ki, gənc müəllimlərlə işləmək insana enerji verir:

“Onların yeni ideyaları, texnologiyadan istifadə bacarıqları var. Tövsiyəm odur ki, həmişə təcrübəli müəllimlərin məsləhətlərinə qulaq assınlar və öz işlərinə sevgi ilə yanaşsınlar.

Uğur yalnız zəhmət və fədakarlıqla gəlir. Müəllim daim oxumalı, öyrənməli və öz üzərində işləməlidir. Şagirdlərə də bunu aşılayıram ki, heç vaxt çalışmaqdan qorxmasınlar”.

Müəllimin həmkarlarına tövsiyələri də var:

“Əziz həmkarlar, biz çox şərəfli bir peşənin daşıyıcılarıyıq. Nə qədər çətinliklərlə üzləşsək də, gələcəyimizi yetişdiririk. Bir-birimizə dəstək olaq, daim öyrənək və şagirdlərimizin uğurunu öz uğurumuz kimi sevək”.

“Hər dəfə bu institutun binasını görəndə “mən burada oxumaq istəyirəm”, – deyirdim”

“Fəxri fərmanla” təltif edilən müəllimlərdən biri də Kəngərli rayon Qabıllı kənd tam orta məktəbində ibtidai sinif müəllimi Gülçöhrə Bayramlıdır. O, 1998-ci ildə Naxçıvan şəhər Qaraxanbəyli qəsəbəsində doğulub, həmin qəsəbədə tam orta məktəbi bitirib. 2015–2019-cu illərdə Naxçıvan Müəllimlər İnstitutunda təhsil alıb.

“Hər dəfə bu institutun binasını görəndə “mən burada oxumaq istəyirəm”, - deyirdim. “İnanmazdım ki, istəyimə çatacağam”, - deyir.

İstəyinə çatıb və hətta uğurlu bir müəllim də olub. 5 illik pedaqoji stajı olan müəllim “Fəxri fərman”la təltif olunan zaman keçirdiyi hisslərini belə ifadə edir:

“Bu fərmanın Beynəlxalq Müəllimlər Günü ilə əlaqədar keçirilən böyük tədbirdə veriləcəyini təsəvvür belə edə bilməzdim. Sevincimin hədd-hüdudu yox idi. Üstümdə məktəbimizi təmsil etməyimin də verdiyi bir məsuliyyət var idi”.

“Hər zaman axtarışdayam, daim təlimlərdə iştirak edirəm”

Gülçöhrə Bayramlı da uşaqlıqdan ibtidai sinif müəllimi olmaq istəyib:

“İbtidai sinif müəllimi olaraq şagirdlərimi daim inkişaf etdirməyə çalışıram. Onlara əvvəlcə vətənpərvər, vicdanlı, ədalətli, mehriban olmağı aşılayıram. Dərslərimi yeni texnologiyalara uyğun keçirəm. Buraxılışı olan siniflərimin şagirdləri monitorinqlərdə yüksək nəticələr əldə ediblər. Məktəbin hazırladığı şeir müsabiqəsində I yer tutublar. Dərsləri maraqlı etmək üçün daha çox rəngli əyani materiallardan, elektron lövhədən, hazırladığım iş vərəqlərindən istifadə edirəm. Açıq dərslərdə geniş şəkildə mövzu ətrafında slaytlar hazırlayıram. Bu kimi vasitələrdən istifadə etdikdə dərs şagirdlərə daha maraqlı gəlir və sevə-sevə öyrənirlər”.

Deyir ki, müasir müəllim daim öz üzərində çalışan, öyrətməyi bacaran, gülərüzlü və səbirli olmalıdır:

“Şagirdlərimlə hər zaman mehriban və səbirli davranmağa çalışmışam. Düşünmüşəm ki, müəllimi sevsələr, fənni də sevəcəklər. Eyni zamanda, müəllim-şagird münasibətini də qorumağa çalışmışam”.

“Dərsi elə sinifdə öyrətməyə çalışıram”

“Hər zaman axtarışdayam, daim təlimlərdə iştirak edirəm”, - deyən Gülçöhrə müəllim 2024-cü ildə sertifikasiya imtahanında iştirak edib və 60 üzərindən 57 bal toplayıb:

“İmtahan şagird üçün olduğu kimi müəllim üçün də vacibdir. Düşünürəm ki, müəllim daim dərsə hazır olmalıdır. Uğur qazanmaq üçün daim çalışmalıyıq. İşimizi düzgün və vicdanla yerinə yetirməliyik.

Hər müəllimin öyrətmək üçün şəxsi metodları olur. Mən də interaktiv təlim üsullarından, əyləncəli oyunlardan istifadə edirəm. Dərsi elə sinifdə öyrətməyə çalışıram”.

Çalışdığı pedaqoji heyətin 90%-i gənclərdən ibarətdir.

“Ona görə də çox rahatlıqla bir-birimizlə müzakirələr aparırıq”, - deyir.

“Son olaraq həmkarlarıma demək istərdim ki, təhsildə ancaq irəli getsinlər, sadəcə “dərsi deyim, çıxım gedim” deməsinlər, onlar şagirdlərinə ruh verməli, yol göstərməlidirlər. Bütün tədbirlərdə aktiv iştirak etsinlər. Bilsinlər ki, bir gün uğur gəlib onları tapacaq”.