ADNSU müəlliminin məqaləsi nüfuzlu beynəlxalq jurnalda dərc olunub

ADNSU müəlliminin məqaləsi nüfuzlu beynəlxalq jurnalda dərc olunub

Azərbaycan Dövlət Neft və Sənaye Universitetinin (ADNSU) “İqtisadiyyat və menecment” fakültəsinin Menecment kafedrasının dosenti, iqtisad üzrə fəlsəfə doktoru Lətif Zeynallının həmmüəllifi olduğu elmi məqalə Xorvatiyanın nüfuzlu “Economic Thought and Practice” jurnalında nəşr olunub. 

“Azərbaycan müəllimi” xəbər verir ki, “Emissiyalar, iqtisadi artım və məşğulluq arasındakı əlaqələrin araşdırılması: Azərbaycanın nümunəsi” adlı məqalədə Azərbaycanın yaşıl iqtisadiyyata keçidi kontekstində CO₂ emissiyaları, iqtisadi artım və məşğulluq arasındakı qarşılıqlı əlaqələr empirik olaraq araşdırılıb.

Məqalədə 1990–2023-cü illəri əhatə edən illik statistik məlumatlar əsasında Toda-Yamamoto səbəb-nəticə analizi tətbiq edilib. Tədqiqat nəticələri iqtisadi artım və məşğulluq arasında statistik cəhətdən əhəmiyyətli qarşılıqlı əlaqənin mövcud olduğunu ortaya qoyur. Bu isə göstərir ki, iqtisadi artımı təşviq edən siyasətlər əmək bazarına da müsbət təsir göstərir. Eyni zamanda, CO₂ emissiyaları ilə məşğulluq arasında müəyyən edilən birtərəfli səbəb-nəticə əlaqəsi ətraf mühit faktorlarının məşğulluq dinamikasına təsirini aydın şəkildə nümayiş etdirir. Məqalədə vurğulanır ki, ölkənin aşağı karbonlu, innovasiyaya əsaslanan iqtisadi modelə keçidi həm “yaşıl iş yerlərinin” yaradılmasına, həm də inklüziv və dayanıqlı iqtisadi artımın təmin olunmasına şərait yarada bilər.

Qeyd edək ki, “Economic Thought and Practice” jurnalı “Scopus” və “Web of Science (WoS)” beynəlxalq elmi bazalarında indeksləşdirilir və Q3 kvartildə yer alır. Jurnal hər il dünya üzrə yüzlərlə müraciət arasından yalnız 30 ən yüksək elmi keyfiyyətə malik məqaləni dərc edir və müəlliflərdən nəşr üçün ödəniş tələb etmir. Bu fakt jurnalın seçicilik dərəcəsinin yüksək olduğunu və yalnız ciddi elmi dəyəri olan tədqiqatlara üstünlük verdiyini göstərir.

https://hrcak.srce.hr/336254