1000 nəfərdən çox təhsil işçisi bu layihəyə müraciət edib - İcraçı direktor

Elm və Təhsil İşçiləri Həmkarlar İttifaqı və “Push30” – Pilot layihəsinə artıq 1000 nəfərdən çox təhsil işçisi müraciət edib.

“Azərbaycan müəllimi” xəbər verir ki, bu sözləri "Push30" şirkətinin baş icraçı direktoru Adil Qasımov Elm və Təhsil İşçiləri Həmkarlar İttifaqı və “Push30” – Pilot layihəsinin təqdimat mərasimindən əvvəl jurnalistlərə açıqlamasında deyib.

O bildirib ki, ümumiyyətlə, bu layihə ilə bağlı çox yaxşı fikirlər aldıq:

"Gözlədiyimizdən artıq müraciətlər qəbul olunub. 1000 nəfərdən çox təhsil işçisi artıq bu layihəyə müraciət edib. Bugünkü tədbirə də bu qədər marağın göstərilməsi və bu qədər iştirakçının burada olması məni çox sevindirir. Bu onu göstərir ki, bizim Elm və Təhsil İşçilərinin Həmkarlar İttifaqı ilə birlikdə həyata keçirdiyimiz bu layihə artıq bəhrəsini verir. Təbii ki, tədbirdən sonra daha dəqiq rəqəmlər məlum olacaq".

O vurğulayıb ki, bu layihə prinsipial xarakter daşıyır.

"Bildiyiniz kimi, təhsil işçilərinin işi çox səbir tələb edir və biz çox istəyirik ki, onların həyatına balans və enerji gətirək. Ona görə, nə qədər çox insan olsa, bir o qədər yaxşı olar. İlk mərhələdə biz 3 min nəfəri nəzərdə tutmuşuq. Artıq 1000 nəfərdən çox müraciət olunub. Düşünürük ki, bu rəqəmləri istədiyimiz səviyyəyə çatdıra bilərik", - deyə Adil Qasımov əlavə edib.