Qardaş ölkələr arasında elm körpüsü: Mingəçevir Dövlət Universiteti və Ege Universiteti bir araya gəldi

Qardaş ölkələr arasında elm körpüsü: Mingəçevir Dövlət Universiteti və Ege Universiteti bir araya gəldi

Mingəçevir Dövlət Universitetinin Türkiyə səfəri davam edir: Ege Universiteti anlaşma imzalandı

Elmi tədqiqat sahəsində yenilik: MDU və Ege Universiteti güclərini birləşdirdi, birgə layihələr hazırlanır

Mingəçevir Dövlət Universiteti (MDU) qardaş ölkə Türkiyə ilə öz elm və təhsil əməkdaşlığını genişləndirməyə davam edir. Universitet nümayəndələri öz görüşlərini davam etdirir. 

Belə ki, 2025-ci ilin 14 oktyabr tarixində rektor Anar Eminovun rəhbərlik etdiyi nümayəndə heyəti Türkiyə Cümhuriyyətinə səfəri çərçivəsində İzmir şəhərində yerləşən Ege Universitetinin (EGE) rektoru, professor Dr. Necdet Budak ilə görüşüb.

Görüş zamanı tərəflər universitetlərarası əlaqələrin konkret istiqamətləri, ortaq tədqiqat layihələrinin icrası, birgə konfrans və seminarların təşkili, eləcə də tələbə və akademik heyətin mübadiləsi məsələlərini müzakirə ediblər. Hər iki tərəf gələcəkdə təhsil proqramlarının uyğunlaşdırılması, ikili diplom modellərinin tətbiqi və innovativ təlim platformalarının yaradılması kimi təşəbbüsləri dəstəkləməyə hazır olduqlarını ifadə ediblər.

Prof. N. Budak MDU-nun nümayəndə heyətini Ege Universitetində görməkdən məmnunluğunu ifadə edib. O, qeyd edib ki, Azərbaycan və Türkiyə arasında təhsil və elm sahəsində münasibətlərin inkişafı iki ölkənin strateji əməkdaşlığının mühüm tərkib hissəsidir. Rektor bildirib ki, Ege Universiteti qardaş Azərbaycanla akademik və elmi əlaqələrin genişləndirilməsində maraqlıdır və bu istiqamətdə həyata keçiriləcək birgə proqramlar, elmi layihələr və mübadilə imkanları hər iki tərəfin təhsil sisteminə töhfə verəcək.

MDU-nun rektoru Anar Eminov səmimi qarşılanmaya görə təşəkkürünü bildirib və vurğulayıb ki, MDU beynəlxalq əməkdaşlıq strategiyasında Türkiyə ali təhsil müəssisələri ilə tərəfdaşlığa xüsusi önəm verir. O qeyd edib ki, bu əməkdaşlıq yalnız elmi mübadilə ilə məhdudlaşmır, həm də mədəni inteqrasiya, innovativ idarəetmə təcrübələrinin paylaşılması, birgə layihələrin həyata keçirilməsi və müəllim-tələbə mübadiləsi sahəsində yeni imkanlar yaradır.

Görüşün sonunda MDU ilə EGE arasında İkitərəfli Əməkdaşlıq Protokolu imzalanıb.

Protokola əsasən tərəflər akademik və mədəni əlaqələrin inkişafı, müəllim, elmi işçi və tələbə mübadiləsinin təşkili, birgə tədqiqatların aparılması və nəticələrinin nəşri, ortaq elmi tədbirlərin keçirilməsi, eləcə də tədris resurslarının, ədəbiyyatların və məlumat bazalarının paylaşılması istiqamətində əməkdaşlıq edəcəklər. Həmçinin tərəflər gələcəkdə ortaq magistratura proqramlarının təşkili, mübadilə iştirakçılarına dəstək mexanizmlərinin yaradılması və tələbələrin beynəlxalq təcrübə imkanlarının genişləndirilməsi barədə razılığa gəliblər.

Protokolun imzalanması mərasimindən sonra MDU-nun nümayəndə heyəti EGE-nin tələbə şəhərciyinə baş çəkib, burada yerləşən tədris binaları, elmi-tədqiqat laboratoriyaları və infrastrukturu ilə tanış olub. EGE-nin müasir təhsil mühiti, innovativ tədris yanaşmaları və tələbə yönümlü infrastruktur imkanları yüksək qiymətləndirilib.

Qeyd edək ki, bu əməkdaşlıqla Mingəçevir Dövlət Universiteti beynəlxalq tərəfdaşlıq xəritəsini daha da genişləndirərək Azərbaycan–Türkiyə təhsil əlaqələrinin möhkəmlənməsində növbəti addımı atmış olur.