ADNSU tələbələri “Hadrut” yarımstansiyası və Rəqəmsal İdarəetmə Mərkəzinə ekskursiya ediblər

ADNSU tələbələri “Hadrut” yarımstansiyası və Rəqəmsal İdarəetmə Mərkəzinə ekskursiya ediblər

Oktyabrın 15-də Azərbaycan Dövlət Neft və Sənaye Universitetinin (ADNSU) Energetika fakültəsinin dekanı, dosent Aydın Əliyevin təşkilatçılığı ilə fakültənin professor-müəllim heyəti və tələbələri Hadrut şəhərinə səfər ediblər.

Universitetdən “Azərbaycan müəllimi”nə bildirilib ki, səfər çərçivəsində iştirakçılar “Azərişıq” ASC-nin 10 illik yubileyinə həsr olunmuş “Yeni nəsil energetiklərin innovasiya və ustalıq bankları” yarışının yekun turunda iştirak ediblər. Yarış “Şükürbəyli”, “Hadrut” və “Şuşa” yarımstansiyaları arasında yaradılmış 35 kV-luq dairəvi elektrik təchizatı sxeminə daxil olan “Hadrut” qovşaq yarımstansiyasında və Rəqəmsal İdarəetmə Mərkəzində keçirilib.

Tələbələr səfər zamanı müasir rəqəmsal idarəetmə prosesləri ilə yaxından tanış olublar. Onlara “Azərişıq” ASC-nin işğaldan azad edilmiş ərazilərdə son 5 il ərzində həyata keçirdiyi genişmiqyaslı layihələr barədə məlumat verilib və Qarabağda aparılan yenidənqurma işlərini əks etdirən videoçarxlar nümayiş etdirilib.

Səfər tələbələrin energetika sahəsində bilik və bacarıqlarının artırılmasına, həmçinin praktik təcrübələrinin genişlənməsinə töhfə verib.