NDU ilə Hüquq və İnsan Haqları İnstitutu arasında görüş keçirilib

Naxçıvan Dövlət Universitetinin rektoru Elbrus İsayev və universitetin nümayəndə heyəti ilə Hüquq və İnsan Haqları İnstitutu PHŞ-nin İdarə Heyətinin sədri Məhəmməd Quluzadə və institut təmsilçiləri arasında görüş keçirilib.

Universitetdən "Azərbaycan müəllimi"nə bildirilib ki, NDU-da keçirilən görüşdə iki qurum arasında əlaqələrin inkişafı, təhsil və elmi fəaliyyətin mövcud vəziyyəti, yeniliklər və bir sıra prioritet məsələlər müzakirə olunub. Qarşılıqlı fikir mübadiləsi aparılaraq hər iki müəssisənin fəaliyyəti barədə ətraflı məlumat təqdim edilib.

Rektor Elbrus İsayev universitetdə əmək bazarının tələblərinə uyğun kadr hazırlığının həyata keçirildiyini qeyd edərək bildirib ki, ölkədə “Hüquqşünaslıq” ixtisasına göstərilən dövlət qayğısı bu sahədə təhsilin keyfiyyətinin yüksəldilməsinə mühüm təsir göstərir. Məhz dövlət dəstəyi nəticəsində NDU-da “Hüquqşünaslıq” ixtisasının tədrisi günün çağırışlarına uyğunlaşdırılıb, ixtisasa qəbul göstəriciləri hər il yüksəlir və sahəyə olan tələbat davamlı olaraq artır. Rektor vurğulayıb ki, hüquq sahəsində tədqiqatçı alimlərin sayının çoxaldılması universitetin strateji prioritetlərindən biridir və bu istiqamətdə ardıcıl tədbirlər həyata keçirilir.

Hüquq və İnsan Haqları İnstitutu PHŞ-nin İdarə Heyətinin sədri Məhəmməd Quluzadə ölkədə hüquqşünaslara artan ehtiyacdan danışaraq tələbələrin tədqiqatyönümlü hazırlanmasının vacibliyini önə çəkib. İnstitutun fəaliyyətini, eləcə də bu sahəyə verdiyi töhfələri diqqətə çatdırıb.

Hüquq və İnsan Haqları İnstitutu PHŞ-nin İdarə Heyətinin sədri Məhəmməd Quluzadə hüquq sahəsinə artan tələbatı qeyd edərək tələbələrin tədqiqatyönümlü hazırlanmasının vacibliyini vurğulayıb. Qeyd edib ki, institut bu istiqamətdə elmi fəaliyyəti gücləndirir.Hüquqşünas alimlərin vahid elektron məlumat bazasının yaradılması elmi mübadiləni asanlaşdıraraq bu sahə üzrə əsas məlumatların – elmi dərəcələr, ixtisas sahələri və reytinq göstəricilərinin bir mərkəzdə toplanmasına imkan verir.