Komitə sədri: Qlobal çağırışlar nəzərə alınmadan uğurlu dini təhsil modeli yaratmaq mümkün deyil

Komitə sədri: Qlobal çağırışlar nəzərə alınmadan uğurlu dini təhsil modeli yaratmaq mümkün deyil

“Dini təhsil nə keçmişə qapalı şəkildə yanaşmalı, nə də müasirlik adı altında mənəvi dəyərləri və ənənələri inkar etməlidir. Bizə ənənə ilə çağırışlar arasında balans yaradan yeni bir model lazımdır”.

“Azərbaycan müəllimi” xəbər verir ki, bu fikirləri Dini Qurumlarla İş üzrə Dövlət Komitəsinin sədri Ramin Məmmədov “Müasir din təhsili modelləri: mənəvi dəyərlər və qlobal çağırışlar kontekstində” mövzusunda keçirilən beynəlxalq simpoziumda səsləndirib.

Komitə sədri bildirib ki, müasir dövrdə dini təhsilin əsas məqsədi mənəvi dəyərlərin, sosial inteqrasiyanın və qlobal dialoqa əsaslanan düşüncənin formalaşdırılmasıdır. Onun sözlərinə görə, rəqəmsal texnologiyalar, mənəvi dəyərlər, qlobal çağırışlar, multikulturalizm və dini radikalizm kimi sosial-psixoloji amillər nəzərə alınmadan uğurlu dini təhsil modeli yaratmaq mümkün deyil.

Ramin Məmmədov qeyd edib ki, bu gün dünyada dini təhsilin müxtəlif modelləri tətbiq olunur. Müxtəlif təcrübələrin sintezi həm qlobal miqyasda inklüziv, həm də mənəvi təməl prinsiplərinə sadiq bir modelin formalaşmasına imkan verir.

O, sülhün, dialoqun və sosial inteqrasiyanın ən təsirli platformalarından birinə çevrilib. Artıq müasir dünyada dini təhsil təkcə dini biliklərin ötürülməsi və maarifləndirilmə ilə məhdudlaşmır:

“Burada mühüm bir sual ortaya çıxır: Bəlkə də hər bir xalqın özünəməxsus dini təhsil modelini qoruyub saxlaması üçün ayrıca konsepsiyaya ehtiyac yoxdur? Bu, müasir dövrdə üzərində düşünülməsi vacib olan əsas məsələlərdən biridir”.