Tələbələr çox maraqlı suallar verirlər – NDU-nun əcnəbi müəllimlərinin təəssüratları - REPORTAJ 

Naxçıvan Dövlət Universiteti (NDU) beynəlxalq əməkdaşlıq əlaqələrini genişləndirərək dünyanın müxtəlif ölkələrindən tanınmış alim və professorları tədris prosesinə cəlb edir. Müxtəlif istiqamətlər üzrə tədris aparan bu mütəxəssislər universitetin beynəlxalq nüfuzuna və elmi potensialına mühüm töhfə verirlər. Artıq İordaniyadan, Türkiyədən və digər ölkələrdən gələn alimlərin dərs dediyi auditoriyalarda çoxmillətli akademik mühit formalaşıb.

"Azərbaycan müəllimi" olaraq biz də bu əcnəbi müəllimlərlə həmsöhbət olub, dərs prosesini izləyirik.

“Azərbaycan və İordaniya mötədillik və dözümlülük baxımından nümunədir”

İordaniyanın Ali-Beyt Universitetinin professoru dr. Mahmud əd-Diki Naxçıvana İordaniya Haşimilər Krallığından gəlib. O, səfərini iki ölkə arasında təhsil və mədəni əlaqələrin yeni mərhələsi kimi dəyərləndirir: “Bu səfər, Azərbaycanın ərəb və İslam dünyası ilə akademik əlaqələr qurmaq istiqamətində atdığı mühüm addımlardan biridir. Bu təşəbbüs, Naxçıvan Dövlət Universitetinin rektoru professor Elbrus İsayev və Azərbaycanın İordaniyadakı səfiri Eldar Səlimovun Ali-Beyt Universitetinə səfərindən sonra gerçəkləşib. O vaxtdan iki universitet arasında elmi, akademik və mədəni əməkdaşlığa dair saziş imzalanıb”.
Professor deyir ki, bu əməkdaşlıq yalnız təhsil deyil, həm də mənəvi dəyərlərin paylaşılması baxımından vacibdir: “Azərbaycan və İordaniya mötədillik və dözümlülük baxımından nümunəvi ölkələrdir. Bizim birliyimiz bu dəyərlərə əsaslanır və əməkdaşlığımıza insani, mədəni dərinlik qazandırır”.
Dr. Mahmud əd-Diki həm də Azərbaycan tələbələrinin ərəb dilinə marağından məmnunluqla danışır: “Tələbələr çox maraqlıdırlar. Ərəb dili 400 milyondan çox insanın danışdığı, “Qurani-Kərim”in dili olan çox zəngin bir dildir. Bu sahədə birgə fəaliyyətimiz gələcəkdə daha böyük layihələrə yol açacaq”.

Türkiyəli professor: “Azərbaycanlı tələbələr parlaq və çalışqandırlar”

İstanbul-Cərrahpaşa Universitetinin professoru Tülin Öztürk artıq bir müddətdir ki, NDU-nun tibb fakültəsinin tələbələrinə dərs deyir. O, həm universitetin tədris mühitindən, həm də tələbələrin elmi marağından çox razıdır: “Tələbələr dərslərə böyük həvəslə gəlirlər, suallar verirlər. Universitetin potensialı məni çox təsirləndirdi. Ümid edirəm, gələcəkdə birlikdə daha yaxşı işlər görəcəyik”.

“Tələbələr hazırlıqlı gəlirlər, dərslərə maraqları yüksəkdir”

Türkiyənin Erciyes Universitetinin dosenti Gökhan Ünal artıq ikinci ildir ki, burada dərs deyir. O, həm tədrisin keyfiyyətindən, həm də tələbələrin məsuliyyətindən danışır: “İlk gündən buradakı dərs modeli diqqətimi çəkdi. Kiçik qruplarda dərs keçmək, tələbələrlə fərdi işləmək çox effektivdir. Tələbələr çox çalışqandırlar, dərsə hazırlıqlı gəlirlər. Onların səyini görmək məni sevindirir”.

Zəngin elmi ənənə və praktiki dərslər

Qara Dəniz Texniki Universitetinin dosenti Gülten Kara “Yerquruluşu və daşınmaz əmlakın kadastrı” ixtisasında tədris aparır. O, dərsləri həm mühazirə, həm də seminar şəklində keçir: “Tələbələr çox istəklidir, davamiyyət yüksəkdir. Çalışırıq ki, praktik biliklər də verək. Artıq Naxçıvanın xəritələrinin tərtibi və mövqe analizləri üzrə tapşırıqlara başlamışıq”.

“Belə tələbələrlə çalışmaq böyük zövqdür”

Ankara Universitetinin professoru Cavid Abdullahzadə hüquq fakültəsində beynəlxalq hüquq fənnini tədris edir: “Üç ay boyunca tələbələrlə birlikdə beynəlxalq hüququn ümumi prinsiplərini öyrənirik. Onlar çox maraqlı suallar verirlər, dərsə həvəsli və diqqətlidirlər. Belə tələbələrlə çalışmaq böyük zövqdür”.

“Tələbələrin öyrənmək istəyi çox yüksəkdir”

Qars Qafqaz Universitetinin professoru Savaş Yıldız təbiətşünaslıq və kənd təsərrüfatı fakültəsində dərs deyir. O, həm də gələcəkdə birgə elmi-tədqiqat layihələri həyata keçirməyi planlaşdırır: “Tələbələrin öyrənmək istəyi və dərsə davamiyyəti bizi çox sevindirir. Burada qonaqpərvərlik və həmrəylik var, bu mühit bizə güc verir. Naxçıvanda özümüzü vətənimizdəki kimi hiss edirik”.

“Burada tullantıların idarəedilməsi və ekotexnologiyaları öyrədirik”

İstanbul-Cerrahpaşa Universitetinin professoru Atakan Öngen memarlıq və mühəndislik fakültəsində tullantı texnologiyaları üzrə dərs aparır: “Mənim sahəm əsasən tullantı su və qida texnologiyaları ilə bağlıdır. Tələbələr bu mövzulara çox açıqdırlar. İlk gündən onların öyrənməyə marağını gördüm və çox məmnun oldum”.

“Azərbaycan tələbələri fərqli və özəldirlər”

Qaziantep Universitetinin professoru Erdal Bay təhsil elmləri kafedrasında dərs deyir. O, Azərbaycanın təhsil mühitini yüksək qiymətləndirir: “Azərbaycan son illərdə təhsil və araşdırma sahəsində böyük addımlar atıb. Mən bir çox ölkələrdə dərs demişəm, amma Naxçıvandakı tələbələr çox fərqli və özəldirlər. Burada işləmək bizim üçün həm qürur, həm də məmnunluq mənbəyidir”.

Professor həm də gələcəyin təhsili haqqında fikirlərini bölüşür: “Dördüncü sənaye inqilabı mərhələsində ixtisaslı kadrlar yalnız mövcud texnologiyalardan istifadə etməklə kifayətlənməməlidirlər. Onlar texnologiyanın inkişafında, dizaynında və idarəsində də aparıcı qüvvəyə çevrilməlidirlər”.

“Tələbələri əzmkar və bilik əldə etməyə həvəsli gördüm”

Naxçıvan Dövlət Universitetində Coğrafiya fakültəsinin “Yer quruluşu” ixtisası üzrə tələbələrə fotogrammetriya fənnindən praktiki dərslər keçirilir. Bu dərsi tədris edən isə Qaradəniz Texniki Universitetinin professoru Fevzi Karslıdır.

Uzun illər lazer skanlama, fotogrammetriya və uzaqdan zondlama texnologiyaları sahəsində fəaliyyət göstərən mütəxəssis bildirib ki, bu dərslərin məqsədi tələbələrin bu sahədə bacarıqlarını inkişaf etdirməkdir: “Fotogrammetriya dərsində tələbələrə bu sahənin nəzəri əsasları ilə yanaşı, tətbiqi tərəflərini də izah etməyə çalışırıq. Onların biliklərini praktikada tətbiq etməsi gələcək peşə fəaliyyətləri baxımından çox vacibdir”. 
Mütəxəssis həmçinin Naxçıvan Dövlət Universiteti ilə təmsil etdiyi ali məktəb arasında qurulan ikitərəfli əlaqələrin əhəmiyyətinə toxunaraq bildirib ki, bu əməkdaşlıq tələbələrin müasir texnologiyaları yaxından öyrənməsinə imkan yaradır.

O, NDU tələbələrinin dərslərə fəal qoşulduğunu, yüksək motivasiya və maraq göstərdiyini vurğulayıb: “Tələbələri çox istəkli, əzmkar və bilik əldə etməyə həvəsli gördüm. Fotogrammetriya, uzaqdan zondlama və lazer skanlama texnologiyaları üzrə keçirilən bu dərslər gələcəkdə universitetlərarası əməkdaşlığa və tələbələrin peşəkar inkişafına töhfə verəcək. Akademik heyətin dəstəyinə və diqqətinə görə minnətdaram”.
Bu gün universitetdə fəaliyyət göstərən xarici professorlar yalnız dərs demir, həm də təhsil mübadiləsini, mədəni yaxınlaşmanı və qarşılıqlı hörməti təmsil edirlər. Onların hər biri elm, mədəniyyət və dostluğun birləşdiyi bu mühitdə yeni nəsil gənclərin formalaşmasına öz töhfəsini verir.