Ümumi təhsildə media savadlılığının artırılması Elm və Təhsil Nazirliyinin diqqət mərkəzindədir.

Bu barədə “Azərbaycan müəllimi”nin sorğusuna cavab olaraq Elm və Təhsil Nazirliyindən bildirilib. Qeyd edilib ki, müasir dövrdə informasiya bolluğu xüsusilə məktəbyaşlı uşaqlar üçün bir sıra risklər yaradır. Uşaqların müxtəlif mənbələrdən aldıqları informasiyaları düzgün qiymətləndirmə, doğrunu yalandan ayırd etmə bacarıqlarının formalaşdırılması mühüm əhəmiyyət kəsb edir. Bu baxımdan şagirdlərdə media savadlılığının artırılması nazirliyin daimi diqqətində saxlanılır.

ETN hesab edir ki, media savadlılığının tədrisində ən səmərəli yanaşma onun inteqrasiya olunmuş formada müxtəlif fənlərin məzmununa daxil edilməsidir. Məsələn, Azərbaycan dili dərslərində şagirdlər xəbərin mənbəyini araşdıraraq öz mülahizələrini bildirə, tarix dərslərində isə informasiya manipulyasiyasının ictimai rəyə təsiri barədə müzakirələr apara bilərlər. Beləliklə, şagirdlər gündəlik informasiya axınına tənqidi yanaşma vərdişləri qazanırlar.

Nazirlikdən həmçinin qeyd olunub ki, yenilənmiş və təkmilləşdirilmiş fənn kurikulumlarında informasiya və media savadlılığının artırılması xüsusi vurğulanır. Şagirdlərə media manipulyasiyası, dezinformasiya və kiberqısnama kimi hallarla mübarizə yolları öyrədilir.
Məsələn, Həyat bilgisi fənni üzrə kurikulumda aşağı sinif şagirdlərinə elektron cihazların insan həyatında rolu, əldə edilən məlumatların təhlili və faydalı informasiyanın seçilməsi bacarıqları aşılanır. İnformatika fənnində isə kibercinayətkarlıq növləri, şəxsi məlumatların qorunması, etibarlı veb-saytların müəyyənləşdirilməsi, süni intellektin müsbət və mənfi tərəfləri kimi mövzular yer alır.

Bununla yanaşı, ümumi təhsil müəssisələrində tətbiq edilən STEAM və “Rəqəmsal bacarıqlar” layihələri çərçivəsində şagirdlərdə yaş xüsusiyyətlərinə uyğun İKT və alqoritmik düşünmə bacarıqları formalaşdırılır.

Nazirlikdən vurğulanıb ki, media savadlılığının effektiv tədrisi məqsədilə müəllimlərə mütəmadi metodiki dəstək göstərilir.