BSU-da "Azərbaycanın Yeni İnkişaf Konsepsiyası və Milli Kimlik" konfransı keçirilib 
 

Noyabrın 6-da Bakı Slavyan Universitetində (BSU) “Zəfər Həftəsi” çərçivəsində “Azərbaycanın Yeni İnkişaf Konsepsiyası və Milli Kimlik” mövzusunda konfrans keçirilib.

“Azərbaycan müəllimi” xəbər verir ki, tədbirdə BSU-nun rektoru Anar Nağıyev, elm və təhsil nazirinin müavini Firudin Qurbanov, Milli Məclisin deputatları Sahib Alıyev, Zahid Oruc, Nəsimi Rayon İcra Hakimiyyətinin nümayəndəsi, Azərbaycan Respublikasının Prezidenti yanında Dövlət İdarəçilik Akademiyasının (DİA) rektoru Urxan Ələkbərov, Cənubi Qafqaz Tədqiqatlar Mərkəzinin (CQTM) direktoru Fərhad Məmmədov, universitetin professor-müəllim heyəti, tələbələr və digər ali təhsil müəssisələrinin nümayəndələri iştirak ediblər.

Konfrans Azərbaycan Respublikasının Dövlət Himninin səsləndirilməsi və Ümummilli Lider Heydər Əliyevin, eləcə də ölkəmizin müstəqilliyi, ərazi bütövlüyü və suverenliyi uğrunda canından keçən şəhidlərimizin əziz xatirəsinin bir dəqiqəlik sükutla yad olunması ilə başlayıb.

Açılış nitqi ilə çıxış edən BSU-nun rektoru Anar Nağıyev bildirib ki, tədbirin mahiyyəti Zəfərin 5 illiyinə həsr olunub və Azərbaycanın inkişaf konsepsiyası ilə milli kimlik məsələlərinin elmi müzakirəsini əhatə edir:

“Qələbənin bizə bəxş etdiyi tarixi və mənəvi nəticələrin ali təhsil və elmi tədqiqat müəssisələri tərəfindən dərindən öyrənilməsi vacibdir. Müharibədən və Zəfərdən sonra bizim dünyagörüşümüz, özümüzə və cəmiyyətə baxışımız dəyişib. Biz daha da bütövləşmiş, möhkəmlənmiş bir millətə çevrilmişik”.
Rektor, həmçinin tədbir iştirakçılarını qarşıdan gələn Zəfər Günü, Dövlət Bayrağı, Konstitusiya və Milli Dirçəliş Günü münasibətilə təbrik edib.
Elm və təhsil nazirinin müavini Firudin Qurbanov çıxışında qeyd edib ki, konfransın Böyük Zəfərin 5 illiyinə həsr olunması böyük rəmzi məna daşıyır.
O bildirib ki, 8 Noyabr – Zəfər Günü Prezident İlham Əliyevin müdrik rəhbərliyi, Ordumuzun qəhrəmanlığı və xalqımızın birliyi sayəsində qazanılmış tarixi Qələbənin təntənəsidir və bu, Azərbaycanın qalib xalq kimi milli kimliyini bütün dünyaya nümayiş etdirdiyi gündür.

Nazir müavini vurğulayıb ki, Prezident İlham Əliyevin rəhbərliyi ilə son illərdə ölkəmiz təkcə hərbi-siyasi deyil, sosial-iqtisadi sahədə də böyük nailiyyətlər əldə edib, “Azərbaycan 2030: sosial-iqtisadi inkişafa dair Milli Prioritetlər” sənədi bu istiqamətdə strateji yol xəritəsi rolunu oynayır.

Konfransda çıxış edən millət vəkilləri, dövlət qurumlarının və elmi mərkəzlərin nümayəndələri Azərbaycanın yeni inkişaf mərhələsində milli kimliyin möhkəmləndirilməsi, azərbaycançılıq ideologiyasının təhsildə və gənclər siyasətində təbliği, qlobal çağırışlar fonunda milli dəyərlərin qorunması məsələlərinə toxunublar.

Çıxışçılar vurğulayıblar ki, Zəfərdən sonra formalaşan milli özünüdərk və dövlətçilik ideyaları ölkənin yeni inkişaf konsepsiyasının ideoloji əsasını təşkil edir. Bu baxımdan ali təhsil müəssisələrində elmi diskussiyalar və ictimai debatların təşkili mühüm əhəmiyyət daşıyır.

Daha sonra tədbirdə qeyd olunub ki, Laçın şəhəri 2025-ci ildə Müstəqil Dövlətlər Birliyinin (MDB) mədəniyyət paytaxtı seçilib. Bu münasibətlə “Konstitusiya və Suverenlik İli” çərçivəsində Azərbaycan Respublikası Prezidentinin Laçın rayonundakı Xüsusi Nümayəndəliyinin, Elm və Təhsil Nazirliyinin (ETN), Bakı Slavyan Universitetinin (BSU) və MDB-yə Üzv Dövlətlərin Humanitar Əməkdaşlıq üzrə Dövlətlərarası Fondunun birgə təşkilatçılığı ilə ali təhsil müəssisələrinin tələbələri arasında keçirilən “Can Laçın” adlı məqalə müsabiqəsinin qalibləri mükafatlandırılıb.

Bununla yanaşı, BSU-nun “Konstitusiya və Suverenlik İli” Tədbirlər Planı çərçivəsində tələbələr arasında təşkil edilən “Suveren Azərbaycan: Keçmişdən Gələcəyə” mövzusunda esse müsabiqəsinin qaliblərinə də diplom və hədiyyələr təqdim olunub.

Tədbir BSU tələbələrinin ifasında təqdim edilən bədii hissə ilə yekunlaşıb.