MEK akademik Mikayıl Useynovun biblioqrafik göstəricisini nəşr edib

MEK akademik Mikayıl Useynovun biblioqrafik göstəricisini nəşr edib

Azərbaycan Milli Elmlər Akademiyasının Mərkəzi Elmi Kitabxanası (MEK) tərəfindən Azərbaycanın görkəmli memarı, Sosialist Əməyi Qəhrəmanı, SSRİ və Azərbaycan Respublikasının Dövlət mükafatları laureatı, akademik Mikayıl Useynovun biblioqrafik göstəricisi hazırlanaraq çapdan çıxıb.

Bu il akademik Mikayıl Useynovun anadan olmasının 120 illiyi qeyd olunur. O, Azərbaycan memarlıq məktəbinin formalaşmasında və milli memarlıq ənənələrinin inkişafında mühüm rol oynayıb, müasir texnologiyalardan istifadə etməklə monumental tikililərin dəyərli nümunələrini yaradıb. Mikayıl Useynov 1945-ci ildə Azərbaycan SSR Elmlər Akademiyasının ilk 15 təsisçisindən biri kimi həqiqi üzv seçilib.

Nəşrdə Mikayıl Useynovun 110 illik yubileyinin keçirilməsi ilə bağlı Azərbaycan Respublikası Prezidentinin Sərəncamı, 120 illik yubileyinin keçirilməsi haqqında AMEA Rəyasət Heyətinin qərarı, alimin həyatı, elmi-pedaqoji və ictimai-siyasi fəaliyyəti ilə bağlı əsas tarixlər, fotoşəkillər, eləcə də tanınmış elm və mədəniyyət xadimlərinin onun haqqında fikirləri yer alıb. Bundan əlavə, əsərlərinin biblioqrafiyası, elmi redaktoru, redaktoru və məsləhətçisi olduğu kitablar, həmçinin yetişdirdiyi dissertantlar haqqında məlumatlar təqdim olunur.

Biblioqrafik göstəricinin elmi məsləhətçisi və ön sözün müəllifi AMEA-nın prezidenti akademik İsa Həbibbəyli, elmi redaktoru akademik Rafael Hüseynovdur. Məsul redaktorlar MEK-in direktoru texnika elmləri doktoru Hüseyn Hüseynov və biologiya elmləri doktoru Tubuxanım Qasımzadədir. Nəşrin redaktoru Biblioqrafiya şöbəsinin rəhbəri, filologiya üzrə fəlsəfə doktoru Aytən Əliyeva, tərtibçisi şöbənin baş biblioqrafı Afət Məmmədova, ixtisas redaktoru isə Elmi biblioqrafiya sektorunun müdiri Nərgiz Novruzovadır.

Biblioqrafiya memarlıq sahəsində çalışan alim və mütəxəssislər, ali məktəb tələbələri və geniş oxucu auditoriyası üçün nəzərdə tutulub. Nəşrin elektron versiyasını MEK-in rəsmi saytında yerləşən E-xidmətlər bölməsindən (mek.org.az/e-kitabxana) əldə etmək mümkündür.