MDU-da “Konstitusiya və Suverenlik İli” çərçivəsində konfrans keçirilib

Noyabrın 13-də Mingəçevir Dövlət Universitetində (MDU) “Konstitusiya və Suverenlik İli” çərçivəsində Azərbaycan Respublikasının Konstitusiyasının qəbul edilməsinin 30-cu ildönümünə həsr olunmuş Təhsil fakültəsinin Tələbə Elmi Cəmiyyətinin XX elmi konfransı keçirilib.

"Azərbaycan müəllimi" xəbər verir ki, universitetin ikinci tədris binasının akt zalında keçirilən konfransda MDU-nun bir qrup akademik-inzibati heyət üzvləri və tələbələr iştirak edib.

Seminarda təhsilin müxtəlif sahələrini əhatə edən on iki elmi mövzu üzrə tələbə məruzələri dinlənilib və müzakirələr aparılıb.

Təhsil fakültəsinin tələbələrindən Rəvan Abdullayev “Suverenlik ideyasının Azərbaycan ədəbiyyatında bədii təcəssümü”, Səyyarə Qaffarzadə “Vətəndaşın hüquqi şüurunun formalaşmasında dilin rolu”, Aydan Səfərova “Konstitusiya dəyərlərinin təbliği suveren və güclü gələcəyin təminatıdır”, Fidan Qasımova “Şekspirdən "TikTok"a: İngilis dilinin dəyişən siması”, Xalidə Cumayeva “İngilis dilinin öyrənilməsində süni intellektdən istifadə və onun tətbiq sahələri”, Nuray Musayeva “İngilis dilinin tədrisinə mədəniyyətin inteqrasiyası”, Sahibə Quluzadə “Sağlamlıq imkanları məhdud şəxslərdə psixi inkişaf pozuntusu”, Nəzrin Nəbizadə “ChatGPT və digər Al vasitələrinin tədris prosesində istifadəsinin etik aspektləri”, Nemət Heybətzadə “Müasir insanın ‘ikili şüuru’: real və virtual dünyada fərqli şəxsiyyətlər”, Arzu Şirinova “Laqranj interpolyasiya çoxhədlisinin müxtəlif şəkilli ifadəsi”, Nəzrin Xasaylı “Çoxhədlilərin eynigüclü çevirmələrində qeyri-müəyyən əmsallar üsulunun tətbiqi” və Fatimə Məmmədli “Riyaziyyatda sonsuzluq və kantor nəzəriyyəsi” mövzularında məruzələrlə çıxış ediblər.

Konfrans tələbələrin elmi-tədqiqat fəaliyyətinə marağını artırmaq, onların analitik və yaradıcılıq qabiliyyətlərini inkişaf etdirmək baxımından mühüm əhəmiyyət daşıyıb. Tədbir iştirakçıları elmi mübadilə şəraitində səmərəli fikir müzakirələri aparıblar.

Qeyd edək ki, MDU-nun silsilə tədbirlərinə uyğun olaraq “Konstitusiya və Suverenlik İli” çərçivəsində müxtəlif tədbirlər davam etdirilir.