AzMİU və Malayziya universiteti arasında əməkdaşlıq memorandumu imzalanıb

Azərbaycan Memarlıq və İnşaat Universiteti (AzMİU) ilə Malayziyanın Asiya-Sakit Okean Texnologiya və İnnovasiya Universiteti arasında əməkdaşlıq memorandumu imzalanıb.

"Azərbaycan müəllimi" xəbər verir ki, sənədin imzalanması Koreyada keçirilən beynəlxalq ali təhsil tədbirləri çərçivəsində baş tutub.

Memorandumun əsas məqsədi iki universitet arasında akademik və elmi əməkdaşlığın genişləndirilməsi, tələbə və müəllim mübadiləsinin təşkili, birgə tədqiqat layihələrinin reallaşdırılması, həmçinin innovasiya və dayanıqlı inkişaf sahələrində təcrübə mübadiləsinin təşviqidir.

Mərasimdə çıxış edən hər iki ali təhsil müəssisəsinin nümayəndələri əməkdaşlıqdan məmnunluqlarını ifadə edərək bildiriblər ki, bu tərəfdaşlıq çərçivəsində birgə tədris proqramlarının, ortaq elmi konfransların, tədqiqat təşəbbüslərinin həyata keçirilməsi hər iki universitet üçün yeni imkanlar yaradacaq.

Qeyd olunub ki, memorandumun imzalanması AzMİU-nun qlobal elm və təhsil məkanında mövqeyinin daha da möhkəmlənməsinə, universitetin Asiya regionu ali təhsil müəssisələri ilə tərəfdaşlıq əlaqələrinin genişlənməsinə və dayanıqlı inkişaf yönümlü beynəlxalq əməkdaşlıqların güclənməsinə əhəmiyyətli töhfə verəcək.