Qəbələ Peşə Təhsil Mərkəzində gənclərin hüquqi bilikləri artırılıb

Qəbələ Dövlət Peşə Təhsil Mərkəzində “Konstitusiya və Suverenlik İli” çərçivəsində maarifləndirici tədbir keçirilib.

"Azərbaycan müəllimi" xəbər verir ki, “İnsan və vətəndaşların hüquq və azadlıqlarının təmin olunması” mövzusunda keçirilən tədbirin əsas məqsədi gənclərdə dövlətçilik ənənələrinə, Konstitusiyaya və milli dəyərlərə hörmət hissini gücləndirmək, onların hüquqi biliklərini artırmaq olub.

Tədbirdə çıxış edənlər vurğulayıblar ki, Azərbaycan Respublikasının Konstitusiyası insan hüquq və azadlıqlarının, qanun qarşısında bərabərliyin və ədalətin təminatçısı olan ali hüquqi sənəddir.

Eyni zamanda Konstitusiyanın qəbul olunma tarixi, dövlət quruluşundakı rolu və suverenliyin möhkəmləndirilməsi istiqamətində görülən işlər haqqında ətraflı məlumat verilib.

Tələbələr də mövzuya dair fikirlərini bölüşüb, Konstitusiyanın əhəmiyyəti barədə çıxışlar ediblər.

Tədbirin sonunda “Konstitusiya və Suverenlik İli”nə həsr olunmuş videoçarxlar nümayiş olunub.