ADNSU-nun nümayəndə heyəti İstanbul Cerrahpaşa Universitetində səfərdə olub

Noyabrın 12-də Azərbaycan Dövlət Neft və Sənaye Universitetinin Tədris məsələləri üzrə prorektoru, dosent Rza Məmmədovun rəhbərlik etdiyi nümayəndə heyəti və Azərbaycanın Türkiyədəki səfirliyinin təhsil məsələləri üzrə müşaviri Nəcibə Nəsibova Türkiyənin nüfuzlu ali təhsil və tədqiqat mərkəzlərindən biri olan İstanbul Cerrahpaşa Universitetində rəsmi səfərdə olublar.

Universitetdən "Azərbaycan müəllimi"nə bildirilib ki, səfər çərçivəsində ADNSU nümayəndələri İstanbul Cerrahpaşa Universitetinin müxtəlif fakültələrində və elmi-tədqiqat laboratoriyalarında olub, tədris və araşdırma mühitinin imkanları ilə yaxından tanış olublar.

Görüş zamanı iki universitet arasında elm, təhsil və tədqiqat sahələrində əməkdaşlıq imkanları, həmçinin birgə layihələrin həyata keçirilməsi perspektivləri ətrafında geniş fikir mübadiləsi aparılıb. Tərəflər ADNSU və İstanbul Cerrahpaşa Universitetində tətbiq olunan tədris proqramları, beynəlxalq tərəfdaşlıq təcrübələri və innovativ tədqiqat istiqamətləri barədə fikir mübadiləsi aparıblar.

Həmçinin iki ali təhsil müəssisəsi arasında tələbə və müəllim mübadiləsi, birgə elmi nəşrlərin hazırlanması, həmçinin laboratoriya və elmi-tədqiqat mərkəzləri arasında əlaqələrin gücləndirilməsi kimi istiqamətlərdə əməkdaşlığın genişləndirilməsi məsələləri müzakirə olunub.

Görüşün sonunda tərəflər gələcəkdə birgə elmi layihələrin reallaşdırılması, beynəlxalq konfransların təşkili və qarşılıqlı təcrübə mübadiləsinin davam etdirilməsi barədə razılığa gəliblər.