"Azərbaycan Bacarıqlar Akseleratoru” layihəsinə start verilib

İqtisadiyyat Nazirliyinin dəstəyi və Dünya İqtisadi Forumunun Bacarıqlar Akseleratoru Şəbəkəsinin (Skills Accelerator Network) tərəfdaşlığı ilə həyata keçiriləcək “Azərbaycan Bacarıqlar Akseleratoru” layihəsinin açılış tədbiri keçirilib.

“Azərbaycan müəllimi” xəbər verir ki, bu təşəbbüs ölkədə ömürboyu təhsil imkanlarının genişləndirilməsinə, bilik və bacarıqların inkişafına, innovativ bacarıq maliyyələşdirmə mexanizmlərinin tətbiqi və bacarıq tələblərinə dair məlumat sistemlərinin qurulmasına yönəlib. 48 yerli qurum (dövlət təşkilatları, ali təhsil müəssisələri və özəl sektor) artıq bu layihəyə üzv olmaq niyyətini təsdiqləyib.

Təşəbbüsün icrası İqtisadiyyat Nazirliyinin dəstəyi ilə Dördüncü Sənaye İnqilabının Təhlili və Koordinasiya Mərkəzi (4SİM) tərəfindən koordinasiya olunacaq. İqtisadiyyat nazirinin müavini Elnur Əliyev, elm və təhsil nazirinin müavini Kənan Kərimzadə, SOCAR-ın prezidenti Rövşən Nəcəf və “PASHA Holding”in Baş icraçı direktoru Cəlal Qasımov bu proqramın Azərbaycan üzrə həmsədrləridir.

Açılış tədbiri çərçivəsində keçirilən yüksək səviyyəli sessiyada Azərbaycan üçün növbəti illərdə prioritet bacarıq istiqamətləri müzakirə olunub.

Müzakirələrdə iştirak edən elm və təhsil nazirinin müavini Kənan Kərimzadə öz növbəsində hər il ölkəmizdə təhsil infrastrukturunun yenilənməsi istiqamətində görülən işlər, gənclərin təhsilinə dəstək məqsədilə həyata keçirilən layihələrdən danışıb.

Hər il Dövlət Proqramı çərçivəsində 500 gəncə dünyanın tanınmış universitetlərində təhsil imkanı yaradıldığını xatırladan nazir müavini gənclərin təhsilinə dəstək məqsədi daşıyan Təhsil Tələbə Krediti Fondunun fəaliyyətinə də toxunaraq bildirib ki, indiyədək təhsil krediti əldə edənlərin 65 faizi qadın olub.

Ölkəmizdə öyrənmə mədəniyyətinin formalaşdığını vurğulayan nazir müavini əlavə edib ki, 4SİM-in Təhsilin İnkişafı Fondu ilə birgə icra etdiyi “4Sİ Akademiyası – Milli Proqram” çərçivəsində seçilən ən fəal istifadəçilər arasında həm 75, həm də 10 yaşlı qalibin olması məhz ömürboyu öyrənmənin nümunəsidir.

İqtisadiyyat nazirinin müavini Elnur Əliyev iqtisadi diversifikasiya və rəqəmsal transformasiya fonunda yeni bacarıqların formalaşdırılmasının zəruriliyinə diqqət çəkib.

SOCAR-ın prezidenti Rövşən Nəcəf “yaşıl keçid” və texnoloji yenilənmə səbəbindən enerji sektorunda ixtisaslı kadrlara ehtiyacın artdığını qeyd edib.

“PASHA Holding”in Baş icraçı direktoru Cəlal Qasımov maliyyə və xidmət sektorlarında rəqəmsal bacarıqların və analitik qabiliyyətlərin əsas prioritetlər olduğunu vurğulayıb.

Dünya İqtisadi Forumunun Təhsil və Bacarıqlar üzrə rəhbəri Neil Alison “Əmək bazarının gələcəyi 2025” (“Future of Jobs 2025”) hesabatının nəticələrini təqdim edib və qlobal bacarıqlar meyillərinin Azərbaycan üçün təsirlərini şərh edib. Sessiya zamanı iştirakçıların bacarıq prioritetlərinə dair rəyləri toplanıb.

4SİM-in icraçı direktoru Fariz Cəfərov milli bacarıq çağırışlarını, əmək bazarında struktur boşluqları və akseleratorun bu problemləri həll etmək üçün təklif olunan çərçivəsini təqdim edib.

“4Sİ Akademiyası – Milli Proqram” çərçivəsində ən fəal istifadəçilərə həmsədrlər tərəfindən sertifikatlar təqdim olunub.

Məlumat üçün qeyd edək ki, “Bacarıqlar Akseleratoru” (Skills Accelerator) DİF-in Yeni İqtisadiyyat və Cəmiyyət Mərkəzi (Center for New Economies and Society) tərəfindən həyata keçirilən və əmək bazarındakı bacarıq boşluqlarını aradan qaldırmaq məqsədi daşıyan qlobal dövlət-özəl əməkdaşlıq platformasıdır. Proqramın əsas məqsədi əmək bazarının gələcək tendensiyalarını müəyyənləşdirmək, ömürboyu öyrənməni və bacarıqların artırılmasını təşviq etmək, həmçinin yüksək keyfiyyətli və dayanıqlı iş yerlərinin yaradılmasını dəstəkləməkdir.

Hazırda “Skills Accelerator” şəbəkəsi 35-dən çox ölkədə fəaliyyət göstərir. Bu ölkələr arasında Bəhreyn, Türkiyə, Gürcüstan, Pakistan, Meksika, Qətər, Birləşmiş Ərəb Əmirlikləri, Nigeriya, Yaponiya və Braziliya kimi dövlətlər də yer alır.