NDU-da “İnformatikada innovasiyalar” adlı müsabiqə keçirilib

Azərbaycan Respublikası Elm və Təhsil Nazirliyi, Naxçıvan Dövlət Universiteti və “Alqoritmika” şirkətinin birgə təşkilatçılığı ilə “Code for Future” layihəsi çərçivəsində “İnformatikada innovasiyalar” adlı bloq müsabiqəsi təşkil olunub.

"Azərbaycan müəllimi" xəbər verir ki, müsabiqədə universitetin “Riyaziyyat və informatika müəllimliyi” ixtisası üzrə IV və V kurs tələbələri iştirak ediblər.

Tələbələr təqdim etdikləri bloqlarda təhsildə mövcud problemləri, onların həlli yollarını, rəqəmsal inkişaf və innovativ yanaşmaları əks etdiriblər. Yazılar iştirakçılara təcrübələrini paylaşmaq, müasir təhsil metodlarına şəxsi baxışlarını ortaya qoymaq imkanı yaradıb.

Müsabiqənin məqsədi tələbələrin informasiya texnologiyaları sahəsində yaradıcılıq və innovasiya bacarıqlarını inkişaf etdirmək, onları rəqəmsal düşüncəyə təşviq etmək olub. Layihə təhsil mühitində müasir texnologiyaların tətbiqi və gənclərin rəqəmsal bacarıqlarının artırılmasına yönəlib.

“Riyaziyyat və informatika müəllimliyi” ixtisasının IV kurs tələbəsi Mədinə Əliyeva təqdim etdiyi bloqla birinci yerə layiq görülərək “Honor Watch” hədiyyəsi ilə mükafatlandırılıb. Digər iştirakçılara isə iştirakçı sertifikatları təqdim olunub.

Qeyd edək ki, ötən aylarda universitetin “Alqoritmika” şirkəti ilə imzaladığı müqaviləyə əsasən, “Code for Future” layihəsi çərçivəsində “Riyaziyyat və informatika müəllimliyi” ixtisası üzrə təhsil alan 50 tələbə “Proqramlaşdırma dilləri: Python və Rəqəmsal bacarıqlar” başlıqlı 2 əsas tədris proqramına uyğun intensiv kurslara cəlb olunub.