Heydər Əliyev Məktəbi ADNSU-da ictimai xadimləri bir araya gətirir

Noyabrın 18-də Azərbaycan Dövlət Neft və Sənaye Universitetinin (ADNSU) nəzdində fəaliyyət göstərən Heydər Əliyev Məktəbinin təşkilatçılığı ilə ictimai xadimlərlə görüşlərə start verilib.

"Azərbaycan müəllimi" xəbər verir ki, Heydər Əliyev Məktəbinin təşkilatçılığı ilə ADNSU-da keçirilən görüşün ilk qonağı millət vəkili, professor Hicran Hüseynova olub.

Görüş Azərbaycan Respublikasının Dövlət Himninin səsləndirilməsi və Ulu Öndər Heydər Əliyevin, həmçinin Azərbaycanın ərazi bütövlüyü uğrunda canlarından keçən şəhidlərimizin xatirəsinin bir dəqiqəlik sükutla yad edilməsi ilə başlanıb. 

Daha sonra ADNSU-nun rektoru, dosent Rüfət Əzizov açılış nitqi ilə çıxış edərək tədbirin əhəmiyyətindən, gənclərin dövlətçilik dəyərləri ruhunda yetişdirilməsində Heydər Əliyev Məktəbinin rolundan danışıb. Tələbələrin Ulu Öndərin adını daşıyan belə bir məktəbin yaradılması təşəbbüsünü yüksək qiymətləndirdiyini deyən rektor Rüfət Əzizov ADNSU-da Ulu Öndərin adını daşıyan muzeyin də olduğunu bildirib, tələbələrə bu şərəfli və məsuliyyətli işdə uğurlar arzu edib. 

Tədbirdə Hicran Hüseynova iştirakçıları salamlayaraq Ümummilli Liderin bir vaxtlar təhsil aldığı ali təhsil müəssisəsində Heydər Əliyev Məktəbinin təşkilatçılığı ilə keçirilən belə bir görüşün ilk qonağı olmaqdan məmnunluğunu bildirib. Ulu Öndər Heydər Əliyevin dövlət idarəçiliyi məktəbi haqqında geniş məruzə ilə çıxış edən Hicran Hüseynova Ümummilli Liderin Vətən və xalq qarşısındakı əvəzsiz xidmətlərindən söz açıb, onun xüsusilə də gənclərə, onların təhsilinə göstərdiyi diqqət və qayğıdan danışıb.

Sonra tələbələri maraqlandıran suallar cavablandırılıb. 

Görüş çərçivəsində Ümummilli Lider Heydər Əliyevin həyat və fəaliyyətinə həsr olunmuş videoçarx nümayiş olunub. 

Sonda Heydər Əliyev Məktəbinin direktoru Sənan Hüseynov məktəbin yeni layihələri, gələcək planları və tələbələrlə aparılacaq işlər barədə məlumat verib.