Bəxtiyar Aslanbəyli: Təhsilə qoyulan investisiyanın geri dönüşü dəfələrlə yüksəkdir

“Bizim sosial layihələrimiz arasında təhsil layihələri xüsusi yer tutur. Bu həm təhsilə verdiyimiz önəmdən, həm də təhsil sahəsinə qoyulan investisiyanın geri dönüşünün dəfələrlə yüksək olmasından irəli gəlir”.

“Azərbaycan müəllimi” xəbər verir ki, bu fikirləri bp şirkətinin Xəzər regionunda xarici əlaqələr və kommunikasiya üzrə vitse-prezidenti Bəxtiyar Aslanbəyli məktəblilərin ingilis dili öyrənməsini dəstəkləyən yeni rəqəmsal məzmunun təqdimatı mərasimində söyləyib.

O bildirib ki, təqdim olunan yeni platformada müəllimlər üçün dialoq imkanı, yarışlar, tapşırıqların bölüşdürülməsi kimi funksiyalar da mövcuddur:

“Bütün bu layihələri həyata keçirərkən, təbii ki, biz hər zaman Elm və Təhsil Nazirliyinin dəstəyini, istiqamətləndirməsini və məsləhətlərini nəzərə alırıq və layihələrimizi onların tövsiyələri əsasında icra edirik. Landau Məktəbindən belə bir təklif gəldi: mövcud resursları daha da zənginləşdirərək fərqli və daha interaktiv formatda hazırlamaq. Yəni müəllimin görüntülü təqdimatı, slaydlar və planşet üzərində misal-həll prosesinin eyni anda ekranda paralel şəkildə göstərildiyi üç komponentli bir format.

Belə yüksəkkeyfiyyətli, özəl məktəb səviyyəsində hazırlanmış bir resursun ölkənin bütün şagirdləri, müəllimləri və valideynləri üçün əlçatan olması təklifini dəstəklədik.

5–11-ci siniflər üçün ingilis dili üzrə dərsliklərin həmin üçlü formatda: görüntülü, slaydlı və vizual izahlı şəkildə hazırlanması artıq tamamlanıb və yaxın zamanda təhlükəsiz internet portallarında yerləşdirilərək istifadəyə veriləcək”.

B.Aslanbəyli qeyd edib ki, bu resurs təhsil prosesinin istənilən iştirakçısı üçün alternativ dərs vəsaitidir: “Şagirdlər məktəbdə keçdiyi dərsə əlavə olaraq alternativ, interaktiv və aydın izahlı dərs vəsaiti əldə edirlər.
Harada çalışmasından asılı olmayaraq hər bir müəllim üçün həmkarlarının fənni nümunəvi şəkildə necə keçməsinə baxmaq, ondan öyrənmək və tətbiq etmək üçün əlavə resursdur.

Övladının dərslərinə nəzarət etmək və ya kömək etmək istəyən valideyn üçün öncədən baxıb özünü hazırlaya biləcəyi materialdır. Bu da onların övladın dərs prosesində daha rahat iştirak etməsinə şərait yaradır. Yəni bu resurs təhsil prosesinin bütün iştirakçıları: müəllim, şagird və valideyn üçün çox faydalıdır”.