Çində şagirdlərin hər gün ən az 2 saat idman etməsi tələb olunacaq

Çinin Təhsil Nazirliyi, Milli İnkişaf və İslahat Komissiyası, Maliyyə Nazirliyi və digər dövlət qurumları birgə sənəd açıqlayaraq “Şagirdlərin bədən sağlamlığını gücləndirmə planı”nı təqdim edib.

"Azərbaycan müəllimi" xarici KİV-ə istinadən xəbər verir ki, sənəddə şagirdlərin fiziki hazırlığını artırmaq üçün 20 əsas tədbir nəzərdə tutulur.

Yeni tələblərə əsasən, ibtidai və orta məktəblərdə şagirdlərin hər gün ən az 2 saat müxtəlif fiziki fəaliyyətlə məşğul olması təmin edilməlidir. Məktəblərə günorta və günün ikinci yarısında olmaqla, hər biri minimum 30 dəqiqə olan keyfiyyətli idman fasilələri təşkil etmək tövsiyə olunur. İdman dərsləri məktəbdənkənar məşğələlərin məcburi hissəsinə çevriləcək, idman növlərinin sayı artırılacaq.

Ali təhsil müəssisələri üçün də yeni normalar müəyyən edilib: bakalavr pilləsində 144 saat, peşə məktəblərində isə 108 saat minimum idman dərsi keçilməsi tələb olunur. Universitetlərdən tələbələr üçün həftədə ən azı 3 dəfə intensiv idman məşğələsi təşkil etmək, həmçinin xüsusi qəbul imtahanlarında idman komponenti əlavə etmək tövsiyə edilir. Həmçinin ali məktəblərə məzunlara “fiziki sağlamlıq sertifikatı” verilməsi təklif olunur.

Sənədə görə, 2027-ci ilə qədər ölkə üzrə bütün məktəblərdə gündəlik 2 saatlıq idman fəaliyyəti tələbi tam şəkildə icra edilməli, məktəb idmanı daha rəngarəng, davamlı və yarış əsaslı formata keçməlidir. Bu müddətə qədər fiziki sağlamlıq göstəriciləri, eləcə də şagirdlərin idman vərdişləri nəzərəçarpacaq dərəcədə yaxşılaşmalıdır.

Plan 8 əsas istiqaməti əhatə edir:
– idman tədrisinin dərinləşdirilməsi;
– məşq, yarış və idmançı hazırlığı sisteminin yenilənməsi;
– güclü idman müəllimi və məşqçi heyətinin formalaşdırılması;
– sağlamlıq monitorinqinin təkmilləşdirilməsi;
– müəllim hazırlığı və motivasiya mexanizminin gücləndirilməsi;
– idman infrastrukturunun yaxşılaşdırılması və rəqəmsal imkanların artırılması;
– sağlam idman mədəniyyətinin formalaşdırılması;
– məktəb–ailə–cəmiyyət əməkdaşlığının genişləndirilməsi.

Rəsmi açıqlamaya görə, 2035-ci ilədək Çində müasir və yüksəkkeyfiyyətli məktəb idmanı sistemi tam formalaşacaq və bu sistem şagirdlərin sağlam böyüməsində əsas rol oynayacaq.