18 ildən sonra yeni başlanğıc: Ana və oğul birlikdə peşə təhsili alır 

Təhsil insan həyatının istənilən dövründə yeni başlanğıc yaratmaq gücünə malikdir. Bəziləri gəncliyində öyrənməyə başlayır, bəziləri isə illər sonra arzusunda olduğu bacarıqları kəşf etmək üçün addım atır. Peşə təhsili isə bunu hər yaşda mümkün edir.

Qəbələ Dövlət Peşə Təhsil Mərkəzində isə bu imkan bir ailənin iki üzvünə eyni anda yol göstərir. Ana və oğlu yan-yana təhsil alaraq həm öyrənir, həm də bir-birinə dəstək olurlar.

Aygül Əhmədxanova Qəbələ rayon Nic qəsəbəsi 4 nömrəli tam orta məktəbdə təhsil alıb və 2007-ci ildə məktəbi bitirib. Ürəyində ali məktəbə daxil olmaq, həkim və ya biologiya sahəsində işləmək arzusu olsa da, ailəvi səbəblər buna imkan verməyib. Məktəbi bitirdiyi il ailə həyatı qurub, qayğıları və sağlamlıq problemləri uzun müddət onun təhsil yoluna mane olub.

Onun arzusunun reallaşması isə böyük övladının peşə təhsili alması ilə başlayıb. Əhmədxanovlar ailəsinin böyük oğlu Ziya IX sinfi bitirdikdən sonra Qəbələ Dövlət Peşə Təhsil Mərkəzində “Baytar texniki” ixtisasında təhsil almağa başlayıb və bu, Aygül xanımın həyatında da yeni dəyişikliklər yaradıb.

Hər bir valideyn kimi övladının təhsili ilə yaxından maraqlanan qayğıkeş ana tez-tez mərkəzə gedir, valideyn iclaslarında və müxtəlif tədbirlərdə iştirak edirdi. Bu ziyarətlər onun peşə təhsilinə baxışını da dəyişib: “O vaxta qədər peşə təhsili deyəndə onu o qədər də ciddiyə almırdıq, adi bir təhsil pilləsi kimi görürdük. Amma övladım orada təhsil aldıqdan sonra gördüm ki, çox savadlı müəllimlər çalışırlar, hər bir tələbəyə xüsusi diqqət ayırır və onlara peşənin incəliklərini öyrədirlər. Oğlum da bu peşəni xüsusilə seçib, çünki bizim tərəflərdə daha çox maldarlıqla məşğul olurlar. Gələcəkdə də bu istiqamətdə peşəsini davam etdirmək istəyir”.

“Bundan sonra oxuyub nə olacaqsan?”

18 ildən sonra təhsilə qayıtmaq asan məsələ deyil. Amma Aygül xanımın yaxınları, ailəsi, xüsusilə həyat yoldaşı onu bu addıma təşviq edib, həvəsləndirib. Həyat yoldaşı onu yaxşı tanıyırdı: eyni məktəbdə oxuduqları illərdən bəri Aygül xanımın elmə və öyrənməyə necə böyük həvəsi olduğunu bilirdi. Bu illər ərzində onun təhsil almadığı üçün içində qalan arzularına, öyrənmək istəyinə şahid olmuşdu. İlk təşəbbüs də elə ondan gəlib: “Əslində, ürəyimdə arzu, istək olsa da, bunu dilimə gətirməmişdim. Amma peşə mərkəzinə gedib-gəldikcə bu hiss daha da gücləndi”, – deyir Aygül xanım.

Bəzi tanışları isə əvvəlcə bu arzuya ciddi yanaşmadı. Qohum-qonşu kənd həyatının çətinliyini, evin gündəlik işlərini əsas gətirərək “bundan sonra oxuyub nə olacaqsan?” sualını verirdi. Amma Aygül xanım arzusundan geri çəkilmədi, “bacarmayacaqsan” deyənlərə qulaq asmadan təhsilinin və arzularının arxasınca getdi.

“Peşə təhsili ilə həyatımda gözəl bir səhifə açıldı”

Aygül xanım dərslərini eyni həvəs və diqqətlə oxuyur. Bəzən uzun illər təhsildən uzaq qalmağın gətirdiyi çətinliklər üzə çıxanda övladları ona dəstək olurlar. Həm ev işlərində, həm də dərslərini öyrənməkdə ona yardım edirlər.

İlk dərs günündə isə oğlu Ziya illər əvvəl onu I sinfə aparan anasının rolunu öz üzərinə götürərək anasını peşə mərkəzinə gətirmiş, mərkəzlə tanış etmiş və sinif yoldaşlarının yanına aparmışdı. Sinifdə oxuyanların bir çoxu da Aygül xanımın həmyaşıdır. Onlar da illər sonra təhsilə qayıdaraq peşə təhsili almağa qərar veriblər: “Əvvəllər sağlamlıqla bağlı problemlərim olduğu üçün yenidən təhsilə başlamaqdan qorxurdum. Amma dərslərə başlayandan sonra gördüm ki, təhsil həm ruhuma, həm də sağlamlığıma müsbət təsir edir. Peşə təhsili həyatımda gözəl bir səhifə açdı”.

Ondan nümunə götürənlər də az deyil...

Aygül xanım söyləyir ki, təhsilə başladıqdan sonra ondan necə qəbul olduğunu soruşanlar, onun kimi yenidən təhsil almaq istəyənlər də az olmayıb.
“Kargüzarlıq və ofis xidmətləri üzrə mütəxəssis” ixtisası üzrə təhsil alan Aygül gələcəkdə də bu sahədə işləməyi düşünür: “İlk dəfə qeydiyyata gedəndə peşə mərkəzində çalışan Reyhan xanım yüksək peşə ixtisasını seçməyimi tövsiyə etdi. Düzü, bir az tərəddüd etdim, çünki davam edə bilməyəcəyimdən qorxurdum. Ona görə birillik bu ixtisası seçdim. Amma onda da dedim ki, mən diplomu evdə saxlamaq üçün istəmirəm, davam edə biləcəyim, işləyə biləcəyim bir ixtisas istəyirdim”.

Aygül Əhmədxanova bununla da kifayətlənməyi düşünmür, o, ali məktəbə qəbul olmağı da arzulayır. Əgər bu istəyini də yerinə yetirsə, gələcəkdə biologiya müəllimi olmaq niyyətindədir.

Aygül xanımın hekayəsi göstərir ki, istək və cəsarət olduqda təhsil heç vaxt gec deyil. Hər yaşda yeni başlanğıclar mümkündür. Ana və oğulun birlikdə təhsil alması isə bunun ən gözəl nümunəsidir.