"Hədəfimiz daha güclü hidrogen avtomobili hazırlamaqdır" - Qalib komanda

Xəbər verdiyimiz kimi, noyabrın 19-da Beynəlxalq STEAM Azərbaycan Festivalı (SAF 2025) yekunlaşıb.

Festivalda Şirvan-Salyan Regional Təhsil İdarəsini 18 komanda təmsil edib. Bu komandaların hər biri finalda fərqlənib.

“Azərbaycan müəllimi” həmin komandalardan biri – “DriveIQ” komandasının üzvlərinin qələbə təəssüratlarını öyrənib.

Komandanın üzvləri - Şirvan şəhər Kimya-biologiya təmayüllü liseyin fizika müəllimi mentor Vasif Zeynalov, liseyin 9-cu sinif şagirdi mexanik Ümid Qədirzadə, 8-ci sinif şagirdi pilot Elşay Atazadə və 8-ci sinif şagirdi dizayner Əli Alızadədir.

Komandaları “DriveIQ” ona görə adlanır ki, bu ad düzgün qərarvermə, mühəndislik düşüncəsi və analitik təfəkkürü ifadə edir. Ümid mexanika, Elşay idarəetmə və sınaqlar, Əli isə dizayn və ünsiyyət üzrə çalışır. Mentor Vasif müəllim komandanı koordinator kimi yönləndirir və texniki dəstək verir:

““DriveIQ” komandası olaraq texnologiya, mühəndislik və bərpa olunan enerji sahələrinə xüsusi maraq göstəririk. Liseydə STEAM fəaliyyəti ilə məşğul olur, həm nəzəri biliklərimizi, həm də praktiki bacarıqlarımızı inkişaf etdiririk. Hidrogen enerjisinə və STEAM layihələrinə böyük marağımız var. Yarış barədə məlumat aldıqdan sonra Vasif müəllimin təşviqi ilə öz bilik və bacarıqlarımızı beynəlxalq arenada sınamaq qərarına gəldik. “H2 Grand Prix Pro” kateqoriyası üzrə hidrogenlə çalışan model avtomobil düzəltdik. İşimizə dizayn, mexaniki yığma, hidrogen yanacaq hüceyrəsinin yerləşdirilməsi, idarəetmə testləri və avtomobilin səmərəliliyinin artırılması daxil idi. Əsas məqsədimiz təcrübə qazanmaq olsa da, hazırlıq prosesində avtomobilimizin yaxşı nəticə verdiyini gördük. Yarışda 1-ci yeri (qızıl medal) tutduq, həmçinin “Ən cəlbedici komanda” nominasiyasının qalibi olduq”.

Komanda üzvləri gələcək planlarından da danışdılar:

“Hədəfimiz növbəti festivallar üçün daha güclü və səmərəli hidrogen avtomobili hazırlamaq, yeni komandaların formalaşmasına dəstək olmağı və beynəlxalq yarışlarda ölkəmizi təmsil etməkdir”.