Yarım kq-lıq körpü 67 kq-lıq yükün ağırlığına tab gətirdi - Məktəblilərdən maraqlı layihə

Balakən məktəblilərinin hazırladığı 655 qramlıq körpü 67.72 kiloqramlıq yükü götürə bilib. Beləliklə, SAF 2025-ə təqdim edilən ən dayanıqlı körpü Balakən rayonu İmadəddin Nəsimi adına 2 nömrəli tam orta məktəbin “NextGen Creators” kateqoriyasında yarışan “MorphoTech” komandasının layihəsi olub.

Komandanın mentoru, məktəbin biologiya və STEAM müəllimi Nubar Qurbanova “Azərbaycan müəllimi”nə bildirib ki, tapşırığa görə, körpü yüngül və dayanıqlı dizaynı ilə seçilməli idi:

“Şagirdlərimiz Zakir Qarayev və Nuran Çantayev bu tapşırığa uyğun dizayn verib, 655 qram ağırlığında körpü hazırlayıblar. SAF-da həmin kateqoriyada xarici ölkə komandaları iştirak edib və bizim uşaqlarımız başqa ölkələrin komandaları ilə yarışıblar. Qiymətləndirmə prosesində həmin körpü ən yüksək nəticə göstərsə də, komandamız təqdimat, final tapşırığı və dizayn kimi meyarlarda zəif nəticə göstərdiyi üçün bürünc medala layiq görülüb”.

Nubar Qurbanova bildirb ki, SAF keçiriləndən bütün yarışlarda iştirak ediblər:

“SAF 2023-də qızıl medal qazandıq.  Keçən il “Engeenering of Future” kateqoriyasında “Ən yaxşı dizayn” üzrə qalib olduq. Texnofestdə iştirak etmişik”.

Komanda üzvləri Zakirlə Nuran yarış hazırlıqlarından danışıblar:

“Əziyyətimiz çox oldu. Məktəbimizdə STEAM Mərkəzi yoxdur. Məktəbimizdəki ləvazimatlarla bu işləri gördük. Rayonumuzda STEAM Mərkəzi olsa, daha möhtəşəm nəticələr qazana bilərdik”.

Buna baxmayaraq, onlar ən dayanıqlı körpü düzəltməyə nail olublar, indi isə qələbələrindən zövq alırlar. Onların sözlərinə görə, indiyədək heç bir yarışdan əliboş qayıtmayıblar:

“Rəqabət mühiti, yarış ruhu möhtəşəm hissdir. SAF-da olmaq bizim üçün çox maraqlı idi”.