Məktəblilər üçün yeni rəqəmsal ingilis dili öyrənmə platforması yaradılıb

bp şirkəti Azərbaycanda rəqəmsal təhsil imkanlarının artırılmasına yönəlmiş sosial investisiya layihəsinin ikinci mərhələsini uğurla tamamlayıb.

"Azərbaycan müəllimi" xəbər verir ki, bu layihə "LANDAU Educational Technologies" MMC ilə əməkdaşlıq çərçivəsində həyata keçirilib. Layihənin əsas məqsədi ingilis dili fənni üzrə buraxılış imtahanlarına hazırlaşan 9 və 11-ci sinif şagirdləri və müəllimləri dəstəkləmək olsa da, təqdim olunan yüksəkkeyfiyyətli və əlçatan rəqəmsal məzmun 5–11-ci siniflərin bütün şagirdlərinin istifadəsi üçün uyğundur. Ümumilikdə yeni materiallar ingilis dilini öyrənmə nəticələrini yaxşılaşdırmaq, həmçinin şagirdlərin dərs prosesində iştirak fəallığını artırmaq üçün orta məktəblərin bütün sinifləri üçün yararlıdır.

Layihənin təqdimat mərasimində çıxış edən elm və təhsil nazirinin müavini Kənan Kərimzadə ölkədə ingilis dili tədrisinin əhatəsi və ingilisdilli ali təhsil proqramlarının artan miqyası barədə məlumat verib.

Nazir müavini bildirib ki, hazırda Azərbaycanda 22 mindən çox tələbə ingilis dilində tədris olunan ixtisaslarda təhsil alır və yalnız bu il bu ixtisaslara qəbul olanların sayı 10 min nəfərə çatıb: “Bu o deməkdir ki, ölkəmizdə ümumilikdə 240–250 min tələbə varsa, onların təxminən 15–20%-i növbəti dörd ildə ingilisdilli proqramlardan məzun olacaq”.

Kənan Kərimzadə qeyd edib ki, qarşıdakı dövrdə əsas diqqət keyfiyyətin artırılmasına yönələcək. Bunun üçün üç istiqamət prioritetdir: müəllim hazırlığı, tədris materiallarının müasirləşdirilməsi və ingilisdilli ali təhsil proqramlarının genişləndirilməsi.

Tədbirdə çıxış edən bp şirkətinin Xəzər regionunda xarici əlaqələr və kommunikasiya üzrə vitse-prezidenti Bəxtiyar Aslanbəyli isə şirkətin təhsil layihələrinə verdiyi önəmdən danışıb:
“Azərbaycanda təhsilin inkişafını innovativ rəqəmsal resurslar vasitəsilə dəstəkləməkdən məmnunuq. Bu layihə həm şagirdləri imtahanda uğur qazanmaq üçün lazımi vasitələrlə təmin edir, həm də müəllimlərin müasir resurslara çıxışını genişləndirir”.

Onun sözlərinə görə, 5–11-ci sinif ingilis dili dərsliklərinin görüntülü, slaydlı və vizual izahlı üçkomponentli formatda hazırlanması artıq tamamlanıb və yaxın vaxtlarda təhlükəsiz internet portallarında istifadəyə veriləcək. Bu resurslar şagirdlər üçün əlavə öyrənmə imkanı, müəllimlər üçün nümunəvi dərs praktikası, valideynlər üçün isə övladlarına dəstək olmaq baxımından əlçatan materiallar təqdim edir.

Layihənin bu yeni mərhələsi əvvəlki səylərin uğuruna əsaslanaraq geniş əhatəli yeni öyrənmə materialları, o cümlədən 60 saatlıq dərs müddətinə uyğun 350 tədris videosu, imtahana hazırlıq üçün 14 000 sualdan ibarət sual bankı, imtahan şəraitini simulyasiya etmək üçün 70 test toplusu, tədris prosesində müəllimlərə kömək məqsədilə hazırlanmış təqdimatlar və iş vərəqləri, həmçinin müəllimlərin ev tapşırıqları verməsinə və şagirdlərin irəliləyişini izləməsinə imkan verən rəqəmsal platforma təqdim edir.

Ümumilikdə bu təşəbbüs əlçatan tədris materialları sahəsində mövcud boşluqları doldurmaqla ölkənin hər yerində həm şagirdlərə, həm də müəllimlərə ünvanlanıb. Ölkə üzrə 500 müəllim və 10 000 şagirdin layihədən bəhrələnəcəyi gözlənilir.

Layihənin ikinci mərhələsinin ümumi dəyəri təxminən 307 500 manat (180 882 ABŞ dolları) təşkil edib. Bunun 200 000 manatını (117 647 ABŞ dolları) bp və onun tərəfdaşları, qalanını isə "LANDAU Educational Technologies" MMC ödəyib.

Müddəti bir il olan layihənin icraçısı "Aspire Learning App" kimi tanınan "LANDAU Educational Technologies" MMC-dir.

Layihənin nəticəsi olaraq hazırlanmış bütün materiallar ümumi istifadəyə açıqdır və ənənəvi tədris kontentini tamamlamaq məqsədi daşıyır. Bu materiallar yerindən və şəraitindən asılı olmayaraq bütün şagirdlərə çevik və inklüziv öyrənmə imkanları yaradır. Yeni məzmun bütövlükdə www.aspirelearning.app veb-saytında yerləşdirilib.