Bakıda Qafqaz və Mərkəzi Asiya IB Dünya Məktəbləri Assosiasiyasının 5 illiyi qeyd edilib

Qafqaz və Mərkəzi Asiya IB Dünya Məktəbləri Assosiasiyasının (CCAAIBWS) fəaliyyətinin 5 illiyinin qeyd edilməsi məqsədilə Avropa Azərbaycan Məktəbində (EAS) genişmiqyaslı tədbir təşkil edilib.

“Azərbaycan müəllimi” xəbər verir ki, tədbirdə ölkənin aparıcı təhsil müəssisələrinin rəhbərləri, IB dünya məktəblərinin nümayəndələri, müəllim və şagirdlər iştirak ediblər.

Tədbir EAS şagirdlərinin rəqs və musiqi nömrələrindən ibarət bədii proqramla açıq elan olunub. CCAAIBWS-in sədri və EAS-ın CEO-su Françesko Bankini assosiasiyanın 5 illik fəaliyyəti üzrə hesabat xarakterli təqdimatla çıxış edib. O, bu müddət ərzində keçirilmiş beynəlxalq və regional IB seminarları, müəllimlər üçün təşkil olunan peşəkar inkişaf tədbirləri, assosiasiyanın yaratdığı konfrans, şəbəkə və təcrübə paylaşımı platformaları, regionda IB təhsilinin artan dinamizmi haqqında faktlara əsaslanan məlumatlar təqdim edib. Çıxışında gələcək illər üçün prioritet istiqamətlər, yeni əməkdaşlıq imkanları və IB təhsilinin Qafqaz–Mərkəzi Asiya regionu üçün strateji önəmi də xüsusi vurğulanıb.

132–134 nömrəli Təhsil Kompleksinin direktoru və CCAAIBWS-in Azərbaycan üzrə nümayəndəsi Aygün Mikayılova çıxışında assosiasiyanın ölkədə IB məktəbləri arasında yaratdığı əməkdaşlıq mühitindən danışıb. O, Azərbaycan IB məktəblərinin son illərdə əldə etdiyi inkişafı, müəllim və şagirdlərin beynəlxalq təcrübəyə çıxış imkanlarının genişlənməsini yüksək qiymətləndirib.

Tədbirin ikinci hissəsində IB Dünya Məktəbinin rəhbəri Rəna Həsənova “Regionumuzda IB-nin gələcəyi” mövzusunda təqdimatla çıxış edib. O, növbəti illər üçün üç əsas regional prioriteti müəyyənləşdirərək məktəblərarası əməkdaşlığın gücləndirilməsi, müəllimlərin peşəkar inkişafı və IB proqramlarında innovativ yanaşmaların tətbiqi ilə bağlı təkliflər irəli sürüb.

Tədbirin davamında Qafqaz və Mərkəzi Asiya IB Dünya Məktəbləri Assosiasiyasının IB diplom və CP proqramları üzrə direktor müavini Tad Harrold, orta təhsil pilləsi üzrə direktor müavini Zöhrə Malikova, IB PYP üzrə direktor müavini Kamilla Orucova, Erkən Təhsil Mərkəzi üzrə direktor müavini Şəbnəm Əliyevanın təqdimatları keçirilib.

Spikerlər liderlik, tədris yanaşmaları və məktəbdaxili inkişaf modelləri haqqında öz təcrübələrini bölüşüblər.
Daha sonra Humanist Pedaqogika Assosiasiyasının professoru Asif Cahangirov çıxış edərək pedaqoji yanaşmalar və müasir təhsil trendləri ilə bağlı tövsiyələr verib.

Tədbirin qonaqları arasında Özbəkistanın “International Talent Academy”nin direktor müavini Laziza Yusupova da yer alıb.

Tədbir çərçivəsində təşkil olunan "dəyirmi masa" müzakirələrində bir neçə məktəb iştirak edib.

Müzakirələr zamanı region üçün prioritetlər, məktəblərin ehtiyacları və IB təhsilində yeni istiqamətlər nəzərdən keçirilib.

Qeyd edək ki, beş il ərzində CCAAIBWS Qafqaz və Mərkəzi Asiya regionunda IB məktəbləri arasında əməkdaşlığın inkişafı, müəllim və liderlərin bir araya gətirilməsi, peşəkar öyrənmə imkanlarının artırılması istiqamətində mühüm nailiyyətlər əldə edib. Təşkil olunan yubiley tədbiri assosiasiyanın yaratdığı güclü professional icmanı və regionda IB təhsilinin davamlı inkişafına sadiqliyini bir daha nümayiş etdirir.