3 qızıl, 6 gümüş, 10 bürünc medal - Mərkəzi Aran məktəblilərinin uğuru

Azərbaycan Respublikasının Elm və Təhsil Nazirliyinin dəstəyi ilə Bakı Ekspo Mərkəzində təşkil olunan Beynəlxalq STEAM Azərbaycan Festivalı (SAF) 2025-də Mərkəzi Aran Regional Təhsil İdarəsinin tabeliyində fəaliyyət göstərən ümumi təhsil müəssisələrinin şagirdlərindən ibarət 3 komanda qızıl, 6 komanda gümüş, 10 komanda bürünc medala layiq görülüb. Əlavə olaraq komandalar müxtəlif nominasiyalar üzrə qalib olub, 12 komanda mükafata layiq görülüb.

Gərgin zəhmətin bəhrəsi

Festivalda Mərkəzi Aran bölgəsini təmsil edən komandalar tərəfindən qazanılan qızıl medallar bölgənin STEAM təhsilindəki irəliləyişini bir daha sübut edib.

Mingəçevir şəhər Ruslan Muradov adına texniki və humanitar fənlər liseyini təmsil edən “Robokod” komandası qızıl medala layiq görülüb. Liseyin direktoru Nailə Məmmədova qeyd etdi ki, “Məktəbimizi təmsil edən altı komanda yarışları 1 qızıl, 1 gümüş, 1 bürünc medal və 1 xüsusi nominasiya ilə başa vurub. Gərgin zəhmət, əzmkarlıq, hədəfə çatmaq istəyi öz gözəl nəticəsini verib”.

Komandanın mentoru Nərminə Nadirova bizimlə söhbəti zamanı vurğuladı ki, “Şagirdlərimiz aylar boyu festivala gərgin hazırlaşdılar. Əldə olunan qızıl medal onların texnologiyaya olan böyük marağının və mentor kimi mənim bu sahədəki təcrübəmin birləşməsindən yaranan bir uğurdur. Belə beynəlxalq yarışlarda qalibiyyət gələcək nəsillər üçün ilham mənbəyidir”.

Qalib şagirdlərdən Polad Həsənov bildirdi ki: “Müsabiqə çox çətin idi, amma biz komanda yoldaşımla birgə bütün çətinliklərin öhdəsindən gəldik. Robotumuzun mükəmməl işləməsi və layihəmizin yüksək qiymətləndirilməsi həyatımın ən xoş anlarından birini yaşatdı. Bu qələbə bizə gələcəkdə mühəndislik sahəsində daha böyük nailiyyətlər qazanmaq üçün motivasiya verdi”.

Onun komanda yoldaşı Nəriman Fərəcli fikirlərini bölüşərkən qeyd etdi ki: “Qızıl medala layiq görüldüyümüzü elan edəndə yaşadığımız sevinc hissi unudulmazdır. Bu, sadəcə medal deyil, zəhmətimizin beynəlxalq səviyyədə təsdiqidir. Mentor müəllimimiz Nərminə Nadirovaya dəstəyinə görə minnətdarıq”.

“Qızıl medal qazanmaq üçün çox çalışdıq”

Ağdaş rayon M.Şeyxzadə adına Texniki, humanitar və təbiət fənləri təmayüllü gimnaziyanın  iki komandası da festivalda 3 komanda ilə yarışıb, nəticədə 2 I yer, 3 II yer, 5 III yer və 4 nominasiya ilə yarışmanı başa vurublar. Qızıl medal qaliblərinindən “Zəfər” komandasının (“Engineers of future” kateqoriyası)  üzvləri ilə həmsöhbət olduq.

Güllü Ədilova (müəllim, mentor) bizimlə söhbəti zamanı vurğuladı: “2023-cü ildən bu festivalda iştirak edirəm və artıq 3 ildir ki, bu yarış mənə və şagirdlərimə böyük uğur gətirib. İlk qızıl medalı 2023-cü ildə qazanmışıq və sonrakı illərdə də uğurlarımızı davam etdirdik”.

G.Ədilova əlavə etdi ki, “2025-ci il bu beynəlxalq festivalın ən çətin kateqoriyası olan “H2 Grand Prix PRO”da 9 xarici ölkə ilə yarışan şagirdlərim böyük uğur qazandılar. Bu festival mənə çox gözəl təəssüratlar yaradıb”.

Leyla Çələbili qeyd etdi ki, "Bizim komandamızın adı “Zəfər” idi və biz həqiqətən zəfər qazandıq. Çətin rəqabətdə birinci yerə çıxmaq böyük bir duyğudur. Bu layihə mühəndislik və proqramlaşdırma sahəsindəki bacarıqlarımızı inkişaf etdirdi”.

Ahu Hüseynova (şagird) fikirlərini bölüşərkən bildirdi ki, “Qızıl medal qazanmaq üçün çox çalışdıq. Beynəlxalq festival mühitini görmək və fərqli ölkələrin komandaları ilə yarışmaq inanılmaz bir təcrübə idi. Mentorlarımızın dəstəyi olmadan bu uğur mümkün olmazdı”.

Nominasiya qalibi olmaq medal qazanmaq qədər önəmlidir

Festivalda “IQ Pro” nominasiyası üzrə qalib gələn “Rolling Minds” komandasının üzvü Şamil Atakişiyev təəssüratlarını belə bölüşdü: “Biz “IQ Pro” nominasiyası üzrə qalib olduq. Layihəmizin innovativliyi və IQ səviyyəsinin yüksək qiymətləndirilməsi bizi çox sevindirdi. Bu uğur bizim üçün böyük bir motivasiyadır”.

Toğrul Mikayılov qeyd etdi ki, “Nominasiya  qalibi olmaq da medal qazanmaq qədər önəmlidir. Bu, bizim yaradıcı düşüncəmizin və problemlərə qeyri-standart yanaşmamızın nəticəsidir. Gələcəkdə bu sahədə daha da irəliləmək istəyirik”.

“Şagirdlərin sevinci gözlərindən oxunurdu”

Kürdəmir rayon Famil Həşimov adına 3 nömrəli tam orta məktəbin “AquaRiders” komandası “Boat Racing” kateqoriyasında uğur qazanaraq gümüş medal ilə yanaşı, “Heart of Engineering Tech Master of the Year” nominasiyası üzrə də mükafatlandırılıb.

Könül Kərimova (mentor) bizimlə söhbəti zamanı bildirdi ki, “Bu kateqoriyaya şagirdlərin meyil və marağını nəzərə alaraq qoşulduq. Düzdür, mentor olaraq ilk dəfə idi ki, SAF Festivalına qoşulurdum. Qarşımıza qalib olmağı hədəf qoymuşduq”.  O əlavə olaraq vurğuladı ki, “Boat Racing” kateqoriyası şagirdlərimizdə mühəndislik bacarığını, fiziki biliklərin tətbiqini inkişaf etdirməyə yol açdı. Növbəti SAF Festivalına bir neçə kateqoriya üzrə qoşulmağı və qalib olmağı öz qarşıma hədəf kimi qoymuşam”.

Ramiz Qəhrəmanlı qeyd etdi ki, “Şagirdlərin sevinci gözlərindən oxunurdu. Bizim bu kateqoriyada bürünc medal qazanmağımız böyük qürurdur. 2022-ci ildə dron üzrə iştirak etmişdik, indi isə bürünc medal qazandıq. Bu, inkişafımızın göstəricisidir”.

İlham Mənsimov (şagird) fikirlərini bölüşərkən vurğuladı ki, “komandamızın gərgin əməyi nəticəsində əldə etdiyimiz bu uğur çox böyükdür. “Boat Racing” layihəmizdəki mühəndislik həllərimizin beynəlxalq münsiflər tərəfindən yüksək qiymətləndirilməsi bizə böyük motivasiya verdi”.

Turqut Xəlil (şagird) isə bildirdi ki, “komanda işi həlledici rol oynadı. Hər birimiz fərqli sahələrdəki bacarıqlarımızı birləşdirərək bu uğura imza atdıq. Növbəti yarışlarda daha böyük hədəflərimiz var”.

“Qazanılan medallar bölgəmizdə STEAM təhsilinin sürətli inkişafından xəbər verir”

Mərkəzi Aran bölgəsi məktəblilərinin bu böyük uğuru ilə bağlı Mərkəzi Aran Regional Təhsil İdarəsinin müdiri Həmid Qasımov da öz fikirlərini bizimlə bölüşdü:

"Mərkəzi Aran Regional Təhsil idarəsi olaraq SAF 2025 Beynəlxalq Festivalında komandalarımızın yüksək nəticə göstərməsi bizim üçün böyük qürur mənbəyidir. Qazanılan qızıl, gümüş və bürünc medallar, həmçinin xüsusi nominasiyalar bölgəmizdə STEAM təhsilinin sürətli inkişafından xəbər verir. Şagirdlərimizin innovativ layihələri, texnoloji bilikləri və sahibkarlıq ruhu gələcək Azərbaycanın inkişafına böyük töhfə verəcəkdir.

Bütün qalibləri, onları dəstəkləyən mentor müəllimləri və valideynləri təbrik edirəm. Mərkəzi Aran təhsili uğurlu nəticələri ilə ölkəmizin hədəflərinə çatmaqda öz rolunu oynayır”.