“Dəmir yolu diaqnostikası”nın tələbələri “World Skills”də ilk dəfə təmsil olunacaqlar

“Bu il “World Skills” yarışlarında Azərbaycan komandasında da adı ilk dəfə salınan “Dəmir yolu diaqnostikası” ixtisası üzrə də təmsilçi olacaq”.

Bunu "Azərbaycan müəllimi"nə “World Skills Azerbaijan”ın rəhbəri Zarina Təhməzova deyib. Onun sözlərinə görə, Şanxayda keçiriləcək yarışlara hazırlıq davam edir. Hazırlıq çərçivəsində müxtəlif təlimlər keçirilir. Bu beynəlxalq yarışa ilk dəfə salındığından sözügedən ixtisas üzrə Çində ödənişsiz təlimlər təşkil edilib. Ötən il təşkil edilən 10 günlük təlimlərə qatılan azərbaycanlı tələbələr burada uğurla iştirak ediblər: “2026-cı ildə yarışlardan əvvəl daha 10 günlük ödənişsiz təlimlərin keçiriləcəyi nəzərdə tutulub. Azərbaycanlı gənclər həmin təlimlərə də qatılacaqlar”.

Zarina Təhməzova bildirib ki, hazırda müxtəlif ixtisaslar üzrə təmsilçilərin seçimi aparılır. Final mərhələsində olan bu prosesə dünən “Aşpazlıq” ixtisası üzrə təmsilçinin seçilməsi ilə start verilib. Növbəti həftə kibertəhlükəsizlik istiqaməti üzrə ölkə təmsilçisi final yarışında müəyyən ediləcək. May ayı ərzində final yarışları davam edəcək və digər 5 istiqamət üzrə də təmsilçilər müəyyənləşdiriləcək.

Qeyd edək ki, Azərbaycan bu il Çində 7 ixtisas üzrə təmsil olunacaq. Komandanın üzvləri “Qaynaqçı”, “Veb texnologiyaları”, “Kibertəhlükəsizlik”, “Aşpazlıq”, “Elektronika”, “Avtomobil diaqnostikası”, “Dəmir yolu diaqnostikası” ixtisasları üzrə təhsil alanlardan seçilib.

Azərbaycanın yarışlarda uğurla iştirak edəcəyinə inandığını deyən müsahibimiz əvvəlki illərdə qazanılan nailiyyətlərə diqqət çəkib: “Bu yarışlara ilk dəfə 2022-ci ildə qatıldıq. Şanxayda keçirilən həmin yarışda Azərbaycan komandası “Medal of excellence”a (Mükəmməllik medalı) layiq görülüb. İkinci dəfə 3 nəfərdən ibarət komanda ilə qatılan azərbaycanlı gənclər  İKT, “Aşpazlıq” və “Bərbər” ixtisasları üzrə təmsil olunublar və yarışda 87 ölkə arasında 20-ci yerdə qərar tutublar ki, Çin, Koreya kimi böyük sənaye ölkələrinin iştirak etdiyi bir yarışda Azərbaycanın belə bir uğur qazanması çox yüksək nəticədir.

Fransada keçirilən sonuncu yarışa qatılan 6 iştirakçı veb texnologiyaları, bərbər, kibertəhlükəsizlik, aşpaz, qaynaqçı, 3D geyim istiqamətləri üzrə təmsil olunub: “Həmin ixtisaslardan biri – 3D geyim Azərbaycanda tələbat olmadığı üçün bu il yarışa qatılan peşələr siyahısında çıxarılıb”.

Z.Təhməzova “World Skills” yarışlarının nüfuzundan danışaraq onu da əlavə edib ki, bu yarışlara qatılan gənclər iş tapmaqda çətinlik çəkmirlər. Nəinki Azərbaycanda, bütün dünyada özkeçmişində bu yarışlarda iştirakı göstərilən hər kəs dərhal işə götürülür: “Bu yarışlarda iştirak edənlər, təlimlərimizə qatılanlar işsiz qalmırlar. İşəgötürənlər “World Skills” yarışının iştirakçılarını dərhal işə götürürlər. Məsələn, bu yarışın ötənilki iştirakçılarından ikisi Dubayda – biri şef, digəri şirniyyatçı olaraq işə dəvət alıb.
Kibertəhlükəsizlik istiqaməti üzrə başqa bir iştirakçı "Azərcell"də çalışır”.