ADPU-da ali təhsildə keyfiyyət və müəllim hazırlığına həsr edilmiş konfranslar keçirilib

Noyabrın 27-də Azərbaycan Dövlət Pedaqoji Universitetində (ADPU) Türkiyənin Ali Təhsilin Keyfiyyəti Şurası (YÖKAK), Təhsildə Keyfiyyət Təminatı Agentliyi (TKTA), ADPU, həmçinin Türkiyənin Sakarya və Çankaya universitetlərinin birgə təşkilatçılığı ilə “Ali təhsildə keyfiyyət üzrə beynəlxalq konfrans (ICQH)” və “Beynəlxalq müəllim hazırlığı konfransı (ITEC)”nın açılış mərasimi keçirilib.

“Azərbaycan müəllimi” xəbər verir ki, tədbirdə elm və təhsil ictimaiyyətinin nümayəndələri, ali təhsil və elmi-tədqiqat müəssisələrinin rəhbərləri, millət vəkilləri, diplomatik korpusların nümayəndələri, Azərbaycan və digər ölkələrdən olan alim və tədqiqatçılar iştirak ediblər.

Tədbirin Türkiyə tərəfdən koordinatoru, Sakarya Universitetinin professoru Aytekin İşman və Azərbaycan tərəfdən koordinatoru, ADPU-nun tədris işləri üzrə prorektoru dosent Eldar Aslanov çıxış edərək hazırlıq prosesi barədə məlumat veriblər. Bildirilib ki, iki gün davam edəcək “Ali təhsildə keyfiyyət üzrə beynəlxalq konfrans”a 210-dan çox, “Beynəlxalq müəllim hazırlığı konfransı”na isə 150-dən çox elmi məqalə və tezis təqdim edilib.

Açılış nitqi ilə çıxış edən ADPU-nun rektoru professor Cəfər Cəfərov ali təhsildə keyfiyyətin yüksəldilməsinin bu gün qlobal müzakirələrin əsas mövzularından biri olduğunu diqqətə çatdırıb. O bildirib ki, cəmiyyətin dinamik inkişafı, əmək bazarının yeni tələbləri və sürətli texnoloji dəyişikliklər ali təhsil müəssisələrindən daha çevik və innovativ yanaşmalar tələb edir. Konfransların qlobal təcrübə mübadiləsi və islahatların müzakirəsi baxımından mühüm platforma olduğunu vurğulayan rektor ölkəmizdə son illər ali təhsildə keyfiyyət təminatı sahəsində həyata keçirilən islahatlardan söz açıb.

C.Cəfərov müəllim hazırlığı sisteminin müasir tələblərə uyğunlaşdırılmasının vacibliyini qeyd edərək “Beynəlxalq müəllim hazırlığı konfransı”nın pedaqoji təhsildə yeni istiqamətlərin formalaşmasına mühüm töhfə verəcəyini bildirib.

Türkiyənin Çankaya Universitetinin rektoru professor Hadi Hakan Maraş, Sakarya Universitetinin rektoru professor Hamza Al, YÖKAK sədri professor Ümit Kocabıçak və TKTA-nın İdarə Heyətinin sədri Tural Əhmədov çıxışlarında konfransın iki ölkə arasında bilik və təcrübə mübadiləsi baxımından strateji əhəmiyyət daşıdığını qeyd ediblər.

Tədbirdə ADPU-nun “Biologiya müəllimliyi” ixtisasının tələbəsi Gülay İmanzadənin piano ifası da təqdim olunub.

Daha sonra plenar iclasın açılış məruzələri dinlənilib. ADPU-nun rektoru Cəfər Cəfərov “Müasir müəllim hazırlığının keyfiyyət göstəriciləri”, YÖKAK sədri prof. Ümit Kocabıçak “Ali təhsildə akkreditasiyaların önəmi və süni intellektin təsiri”, TKTA sədri Tural Əhmədov isə “Ali təhsil müəssisələrinin institusional və proqram akkreditasiyası üzrə çağırışlar və gözləntilər” mövzusunda məruzələrlə çıxış ediblər.

Plenar iclas başa çatdıqdan sonra hər iki konfrans öz işini 18 bölmədə müzakirələrlə davam etdirib.