NDU qlobal təhsil xəritəsində irəliləyir: tədrisi ingiliscə olan ixtisasların yaratdığı imkanlar

Bu gün dünyada ali təhsilin əsas istiqamətlərindən biri beynəlxalq tədris mühitinə inteqrasiyadır. Naxçıvan Dövlət Universiteti də bu istiqamətdə aparıcı mövqelərdən birini tutur. Universitetdə ingilis dilində tədris olunan ixtisaslar gənclərə qlobal biliklər qazanmaq, müasir elmi trendlərlə ayaqlaşmaq və beynəlxalq əmək bazarına çıxış imkanı verir.

Ali təhsil ocağında “Tibb”, “Kompüter mühəndisliyi”, “İqtisadiyyat”, “İnformasiya təhlükəsizliyi” (4+1) və “Beynəlxalq münasibətlər” (4+1) ixtisaslarında tədrisin ingilis dilində aparılması tələbələrə peşə bilikləri ilə yanaşı, həm də beynəlxalq səviyyədə düşünmə və rəqabətqabiliyyəti qazandırmağı hədəfləyir. İlk dəfə 2020-ci ildə “İqtisadiyyat” ixtisası üzrə qəbul həyata keçirilib. Hazırda NDU-da tədrisi ingilis dilində 5 ixtisas üzrə 327 tələbə təhsil alır. Bu rəqəm hər il artan templə inkişaf edir.

Tədrisi ingilis dilində həyata keçirilən ixtisasların əsas üstünlüklərindən biri də tələbələr üçün gələcək iş və karyera imkanlarıdır. Bu onların nəzəri biliklərlə yanaşı, praktik, analitik və kommunikativ bacarıqlara yiyələnməsi ilə bağlıdır. Belə ki, qlobal tədris dili tələbələrə müxtəlif ölkələrin təcrübəsini öyrənmək, beynəlxalq layihələrdə iştirak etmək və xarici təhsil proqramlarına qoşulmaq fürsəti yaradır.

Naxçıvan Dövlət Universitetində bütün sahələrdə olduğu kimi beynəlxalq elmi əlaqələr də artan xətlə inkişaf edir. Əcnəbi müəllimlərin tədris prosesinə qoşulması digər ixtisaslarla yanaşı, ingilisdilli ixtisaslarda da həyata keçirilir. Bu, tələbələrin nəzəri bilikləri beynəlxalq təcrübə ilə birləşdirməsinə və müasir texnoloji trendləri yerində öyrənməsinə şərait yaradır.

Ali təhsil ocağında informasiya texnologiyaları sahəsində yerli və xarici universitetlərlə tələbə mübadiləsi və ikili diplom proqramlarının aktuallığı daim diqqətdə saxlanılır. Bu proqramlar tələbələrə həm NDU-da, həm də əməkdaşlıq çərçivəsində xarici universitetdə təhsil alaraq iki diplomla məzun olmaq fürsəti verir. Bu addım universitetin beynəlxalq əlaqələrini möhkəmləndirir və tələbələrə daha geniş elmi imkanlar qazandırır. Belə ki, NDU ilə Macarıstanın Con Fon Neyman Universiteti arasında ingilis dilində “Kompüter mühəndisliyi” ixtisası üzrə ikili diplom proqramı həyata keçirilir. Bununla yanaşı, “Tibb” ixtisası üzrə SABAH qruplarında da tədris ingilis dilində aparılır.

Universitetdə ingilisdilli ixtisaslarda təhsil alan tələbələr üçün yaradılan şərait onların akademik səviyyədə inkişafına, beynəlxalq imtahanlara hazırlaşmasına və qlobal əmək bazarına çıxmasına geniş imkanlar açır. Tədris prosesi müasir metodologiyalar əsasında qurulur, tələbələr mütəmadi olaraq beynəlxalq proqramlaşdırma təlimlərinə cəlb olunurlar.

Mövzunu daha dərindən araşdırmaq üçün universitetdə tədrisi ingilis dilində ixtisaslarda təhsil alan bəzi tələbələrlə həmsöhbət olduq.

Bağırlı Ləman – tədrisi ingilis dilində olan “İqtisadiyyat” ixtisasının IV kurs tələbəsi: "Gələcəkdə beynəlxalq şirkətlərdə və ya xarici təhsil proqramlarında iştirak üçün məndə zəngin baza yaranır.

“İqtisadiyyat” ixtisasını ingilis dilində oxumaq mənə həm nəzəri, həm də praktik baxımdan çoxsaylı üstünlüklər qazandırıb. Əvvəla, iqtisadi ədəbiyyatın əksəriyyəti ingilis dilində olduğuna görə bu sahədə ən son tədqiqatlara birbaşa çıxış imkanım var. Bundan əlavə, dərslərin ingilis dilində aparılması mənim akademik yazı, təqdimat və analitik düşünmə bacarıqlarımı inkişaf etdirib. Bu, gələcəkdə beynəlxalq şirkətlərdə və ya xarici təhsil proqramlarında iştirak üçün məndə zəngin baza yaradır. Artıq beynəlxalq tədbirlərdə və layihələrdə iştirak edərək qlobal iqtisadi trendləri anlama bacarığımı artırmışam. Məsələn, FIDE-16 Ümumdünya Şahmat Olimpiadasında bələdçi və tərcüməçi kimi fəaliyyətim fərqli ölkələrdən gələn insanlarla kommunikasiya və komanda işi bacarıqlarımı əhəmiyyətli dərəcədə gücləndirib.

Dərslərin tədrisi ingilis dilində olduğu üçün həm yerli, həm də xarici ədəbiyyatlardan istifadə edirik. Beynəlxalq elmi bazalarla rahat işləyib təhlil aparma və nəticə çıxarma bacarıqlarımı inkişaf etdirirəm. Universitetin təqdim etdiyi imkanlardan maksimum yararlanmağa çalışıram. İngilisdilli iqtisadiyyat təhsili mənə beynəlxalq düşüncə tərzi qazandırıb və bu, gələcək karyeram üçün çox önəmlidir. Mən gələcəkdə iqtisadi analiz və idarəetmə sahəsində beynəlxalq səviyyədə fəaliyyət göstərmək istəyirəm. Aldığım bilik və bacarıqlar mənə həm yerli, həm də xarici əmək bazarlarında rəqabət üstünlüyü verir".

Babayev Əziz – tədrisi ingilis dilində olan “İnformasiya təhlükəsizliyi” ixtisasının I kurs tələbəsi: "İngilisdilli ixtisasda təhsil almaq həm prestijli, həm də böyük məsuliyyətdir”

“Mən – Babayev Əziz. 2024-cü ildə Naxçıvanda ilk dəfə yaradılan, tədrisi ingilis dilində olan “İnformasiya təhlükəsizliyi” ixtisasına qəbul olmuşam. Bizim təhsil modelimiz beşillikdir. İlk ilimiz hazırlıq kursu idi. Bizə həm ingilis dili, həm də kompüter elmləri üzrə gələcək dörd ilə hazırlıq məqsədilə bir illik kurs keçdilər. Mənim fikrimcə, bu, xarici dil biliyimi möhkəmləndirmək baxımından böyük bir şans idi. Mənə verilən tapşırıqları bizə hazırlanan sillabus əsasında yerinə yetirdim və irəlilədikcə daha çox öyrənmək istədim. Artıq yeddinci ayın sonunda universitetdə təşkil olunan IELTS imtahanında iştirak edərək 7 bal topladım (CEFR üzrə C1 səviyyəsi).

Dərslər olduqca keyfiyyətlidir: 90 dəqiqə ərzində ingilis dilində fikir mübadiləsi aparırıq, həmçinin kodlaşdırma və riyazi məntiqimizi inkişaf etdirən məsələlər üzərində çalışırıq. Bir neçə elmi konfransda iştirak etməyim də mənim üçün önəmli təcrübədir. Naxçıvanda ilk dəfə tədris olunan bu ixtisasın ilk tələbələri olmaq qürurvericidir. Xüsusilə, ingilisdilli ixtisasda təhsil almaq həm prestijli, həm də böyük məsuliyyətdir”.

Qeyd etmək yerinə düşər ki, ingilisdilli ixtisasların inkişafı, xarici müəllimlərin cəlbi, beynəlxalq əməkdaşlıqlar və akademik imkanların genişləndirilməsi Naxçıvan Dövlət Universitetini qlobal təhsil xəritəsində daha da önə çıxarır. Bu təşəbbüslər gənclərə bilik, təcrübə və beynəlxalq düşüncə qazandırır, onların gələcəkdə ölkəmizi dünyada layiqincə təmsil edən müasir mütəxəssislər kimi formalaşmasına zəmin yaradır.

Məlumat üçün bildirək ki, ali təhsil ocağında ingilis dilində tədrisin effektivliyini təmin etmək üçün universitetdə akademik dil infrastrukturu da yaradılıb. Tələbələr IELTS (International English Language Testing System), SAT (Scholastic Assessment Test) imtahanlarına hazırlıqlarla yanaşı, müxtəlif texnoloji və analitik bacarıqları inkişaf etdirən və IBM (International Business Machines) üzrə təşkil olunan təlimlərdən də yararlanırlar. Bütün bunlar tələbələrin dil bilikləri ilə yanaşı, tənqidi düşünmə və qərarvermə bacarıqlarını gücləndirir.