Müasir müəllimin yeni bacarıqları mövzusunda təlim keçirilib 

Azərbaycan Gənc Müəllimlər Assosiasiyasının təşkilatçılığı və Azərbaycan Respublikası Gənclər Təşkilatları Milli Şurasının “Şəbəkə: Gənclər Təşkilatlarının fəaliyyətlərinə dəstək” proqramı çərçivəsində müəllimlər üçün iki günlük “Süni intellekt və təhsil: Müasir müəllimin yeni bacarıqları” adlı təlim keçirilib.

“Azərbaycan müəllimi” xəbər verir ki, təlim müasir müəllimlərin süni intellekt sahəsində bilik və bacarıqlarını artırmaq, təhsildə rəqəmsal alətlərin daha geniş tətbiqini təşviq etmək məqsədilə təşkil edilib.

Proqram çərçivəsində iştirakçılar süni intellektin təhsildə rolu, fərdiləşdirilmiş tədris, avtomatik qiymətləndirmə, innovativ məzmun yaradılması və interaktiv öyrənmə yanaşmaları ilə tanış olublar.

ARTİ-nin Metodik xidmətin əlaqələndirilməsi şöbəsinin müdiri Səbinə Balayevanın keçirdiyi sessiyalarda "ChatGPT", "EduaideAI", "Khanmigo" və "DeepSeek" kimi süni intellekt vasitələrinin praktiki tətbiqləri nümayiş etdirilib.

Təlimin ikinci günü "Code for future" layihəsinin (ali məktəblərdə informatikanın tədrisi) təlimçisi Şəfəq Ələkbərova “Süni intellekt: problemlər, yeni yanaşmalar və imkanlar” mövzusunda interaktiv sessiya keçirib. Təlim həm nəzəri, həm də praktiki fəaliyyətlərlə zəngin olub və iştirakçıların rəqəmsal bacarıqlarının inkişafına mühüm töhfə verib.

AGMA-nın sədri Pərvinə Qədimova “Azərbaycan müəllimi”nə açıqlamasında bildirib ki, müasir müəllimin zəif cəhətlərindən biri süni intellektdən istifadə ilə bağlıdır. Bu baxımdan layihənin əhəmiyyətinə diqqət çəkən sədr müəllimlərin sürətlə inkişaf edən texnologiyalarla ayaqlaşmasının vacibliyini vurğulayıb.