Gələn ildən Yusif Məmmədəliyev adına Kimya Olimpiadası keçiriləcək

“Bir çox ölkələrdə, xüsusilə Azərbaycanın yaxın coğrafiyasında alimlərin və elmə böyük töhfə vermiş şəxsiyyətlərin adını yaşatmaq, gələcəyə sərmayə qoymaq və düzgün rol modelləri formalaşdırmaq məqsədilə məktəblilər arasında beynəlxalq olimpiadalar təşkil olunur. Belə yarışmalar həmin şəxslərin adını elm brendinə çevirir”.

“Azərbaycan müəllimi” xeber verir ki, bu fikirləri bu gün Azərbaycan Milli Elmlər Akademiyası Rəyasət Heyətində Akademik Yusif Məmmədəliyevin 120 illiyinə həsr olunmuş beynəlxalq konfransda elm və təhsil naziri Emin Əmrullayev səsləndirib.

Nazir bildirib ki, bu baxımdan növbəti ildən başlayaraq Yusif Məmmədəliyev adına Kimya Olimpiadasının keçirilməsi planlaşdırılır. Olimpiada həm Azərbaycan, həm də region ölkələrinin şagirdlərini əhatə edəcək:
“Bu, olduqca vacib təşəbbüsdür. Azərbaycanın kimya sahəsində beynəlxalq olimpiadalarda əldə etdiyi uğurlar, həmçinin alimlərimizin elmi nəticələri bizə imkan verir ki, məhz kimya və ya tədqiqat yönümlü bir olimpiadanı uğurla təşkil edək”.

Emin Əmrullayev əlavə edib ki, belə təşəbbüslərin davamlılığının təmin olunması xüsusilə əhəmiyyətlidir: “Vaxt keçir, dövrlər dəyişir, lakin bu işlərin ardıcıllığını qorumaq üçün yeni mexanizmlərin qurulması vacibdir”.